Bamir Topi merr angazhim publik: Nuk kthehem më në Presidencë

Bamir Topi, kryetar i Frymës së Re Demokratike, deklaron se nuk ka ambicie për t’u rikthyer në karrigen e Presidentit, edhe në rast se do t’i ofrohet kjo mundësi. Në emisionin “Studio e Hapur” ish-kreu i shtetit i kërkoi moderatores Eni Vasili që ta mbajë të regjistruar në arkiv këtë deklarim publik të tij në mënyrë që në të ardhmen të verifikojë edhe koherencën e tij. Madje,Topi hodhi poshtë edhe zërat se ka pasur ambicie për një rizgjedhje të tij në krye të shtetit ndërsa po përfundonte mandatin e parë. “Nuk kam aluduar për një mandat të dytë.  Nuk e kam asnjëherë më këtë ambicie. Nuk jam peng i pazareve politike, jam ky që jam. Kam bërë karrierën time normale” deklaroi Topi. Ai i është përgjigjur edhe interesit mbi darkën që ka konsumuar me kryeministrin Edi Rama para disa ditësh. Bamir Topi tha se ka qenë një takim normal, por pa bërë të ditur detaje. I pyetur nëse ka pasur takime të mëtejshme pas darkës, Topi tha se nuk ka pasur këto kohë, por jo se nuk do të ketë në të ardhmen.

“Unë jam i hapur atë që them në studio për publikun tentoj të bëj një bisedë normale por nuk mund ta vendos veten në rolin e këshilltarit të zotit Rama. Nëse ai do e kërkonte një këshillë unë do isha i gatshëm me eksperiencën time t’ia jepja. Nuk ka pasur më komunikim pas takimit, por kjo nuk do të thotë që nuk do ketë. Ajo darkë, ka qenë një darkë normale. Ka shumë hiperbola rreth darkave të tilla. Nuk ka pasur absolutisht një komunikim” tha Topi. 

k.k