Vizioni i ri osman i Turqisë dhe rishikimi i teksteve të historisë në Kosovë

Një arbëresh, Vincenzino Ducas Angeli Vaccaro, ka shkruar një shkrim të përkthyer e të publikuar nga Shqipi, me anë të të cilit ai ngrihet kundër praktikës së rishikimit të teksteve të historisë me një logjikë empatike. Është një praktikë që po adoptohet në Ballkan nën trysninë e Brukselit, por edhe të Turqisë. Autori italian me origjinë të hershme shqiptare është informuar nga gazetat e Prishtinës, se kjo gjë po ndodh edhe në Kosovë, dhe shkruan: “qeveria turke kërkon t’i imponojë Kosovës revizionimin me shumë ndryshime thelbësore të përmbajtjes së disa teksteve shkollore të historisë që kanë të bëjnë me periudhën osmane… Deklaratat e qeverisë turke – përmes ambasadorit të saj në Kosovë, Songul Ozan – që synojnë ndryshimin e përmbajtjes së teksteve shkollore janë një akt i qartë fyerjeje ndaj kulturës, historisë, protagonistëve të ngjarjeve historike si edhe vetë studiuesve”, shkruan ai.

Vincenzino Ducas Angeli Vaccaro është i skandalizuar nga format konkrete të rishikimit. Fjali të ngjashme me pohimin se “osmanët vranë shumë shqiptarë” nuk do të jenë më pjesë e teksteve të historisë. Po kështu, pohimi “pushteti osman ishte pengesë në hapjen e shkollave shqipe”, do duhet të bëhet “pengesa kish si nga pushteti osman, ashtu dhe nga kisha ortodokse greke”. Fjalët dhunë e vrasje do të zëvendësohen me fjalët pushtim e burgosje. Etj., etj.

Re.Pu.