Skënder Gjinushi pohon në “Gazeta Shqiptare” se do dali në zgjedhje me Dritan Priftin: Bashkëpunim moral dhe politik

Pasi vendosi të dalë i vetëm në zgjedhjet e 21 Qershorit, kryetari i partisë Socialdemokrate, Skënder Gjinushi thotë, se partia e tij do të kërkojë mbështetjen e të majtëve të zhgënjyer nga qeverisja e Ramës edhe pse shton se në zona të caktuara do mbështesë kandidatët e PS­së. Në një intervistë për “Gazetën Shqiptare”, gjithashtu Gjinushi pohon se ish-deputeti i LSI­së, Dritan Prifti e mbështet moralisht dhe politikisht PSD­në në këto zgjedhje. “Ai e ka shprehur vetë publikisht, që ka një interes për t’u kthyer në politikë. Po si Dritan Prifti ka shumë ish-deputetë të majtë, nga PS apo nga LSI, që hë për hë duan që një alternativë tjetër të forcohet, pra është ajo pjesa që e sheh veten të margjinalizuar e që fillon që nga socialistët e thekur e deri te persona që kanë kontribuar në strukturat e së majtës deri në nivelet e larta. Dhe, në këtë kontekst, ai ka shfaqur dëshirën për të bashkëpunuar edhe me PSD-në. Këto janë zgjedhje lokale. Dhe në tërësi persona të tillë nuk kandidojnë vetë, sepse dilet me kryetarë bashkish. Kështu që, kontributi është moralopolitik”, tha Gjinushi për “Gazeta Shqiptare”.