Shqip: Demokratët “i japin vetes” një humbje me rezultat të ngushtë

Shqipi i sotëm flet për një sondazh të kryer nga vetë demokratët, dhe për një shqetësim brenda maxhorancës mbi rezultatet që u kanë dalë. Ja se si e nis raportimin e tij gazetari Herion Mesi: “Edhe pse nuk bëhen të ditura shifrat [sipas qarqeve], burimet brenda mazhorancës theksuan se shifrat e mbërritura në dorën e Berishës janë cilësuar si ‘shqetësuese’, por jo ‘fatale’.... Ekziston shqetësimi se po ndryshon për keq gjendja edhe në zonat e cilësuara si bastione, si Dibra e Lezha. Sipas rezultateve të këtij sondazhi të brendshëm të realizuar nga vetë PD-ja, rezulton se e djathta do të humbë me rezultat të ngushtë.”

Disa të dhëna të këtij sondazhi (nuk përcaktohet burimi; flitet për një burim brenda PD-së): “Sa i përket kandidatit të pavarur në Vlorë, socialistit Arben Malaj, në sondazhin e realizuar nga PD-ja rezulton se ky ka një mbështetje prej 1200 votash, gjë që nuk do të ndikojë sa i përket ndryshimit të balancave së shpërndarjes së mandateve në këtë qark. Në Qarkun e Dibrës rezulton se merr një mandat kandidati i FRD-së, Sali Shehu. Në Qarkun e Lezhës pritet të jetë një tjetër qark ku socialistët duket se kanë bërë surprizën e radhës elektorale. Nga sondazhi i brendshëm i saj, Partia Demokratike rezulton të ketë humbur terren, kjo pasi, sipas demokratëve, ka ndikuar në radhë të parë emërimi në krye të listës së PD-së i ministrit aktual të Kulturës, Aldo Bumçi, i cili nuk ka lidhje me këtë zonë. Gjithashtu, një tjetër shkak i rezultatit surprizë është dhe lënia jashtë listës së kandidatëve të Paulina Hotit dhe deputetit tjetër Rajmond Hoxha. Por sa i përket kampit të majtë, një ndikim të fuqishëm në votën e së majtës ka qenë dhe kandidimi i Monika Kryemadhit, numrit dy të LSI-së. Kryemadhi, sipas burimeve nga selia blu, po investohet shumë në fushatën e Lezhës, gjë që ka sjellë dhe kthim të rezultatit në favor të së majtës.”

Shkrimin e plotë të Herion Mesit mund ta ndiqni në linkun http://gazeta-shqip.com/lajme/2013/06/07/sondazhi-i-brendshem-i-pd-se-parashikon-humbje-ne-zgjedhje/

Re.Pu.