Revista Klan vendos në krye të 10 personazheve të vitit, një grua që mëson falas fëmijët e ngujuar

Revista Klan ka shpallur në numrin e fundit 10 personazhet e vitit sipas një tradite të konsoliduar të saj prej vitesh, por që tashmë është përhapur e shtrirë në shumë formate mediatike. "Jemi fokusuar tek personazhe që jo thjesht kanë spikatur përmes suksesit personal, por që përmes këtyre arritjeve kanë rrezatuar për mirë edhe mbi shoqërinë shqiptare" - thuhet në hyrje të artikullit të Klanit që e hap renditjen me një mësuese të quajtur Liljana Luani: 
"Do të dëshironim me gjithë shpirt që përzgjedhje si kjo e jona të përbëheshin 100% nga individë të tillë, dhe le të mos i njihte askush. Duket e çuditshme për një vend si Shqipëria, por Liljana Luani njihet në qytetin e saj dhe jo vetëm, pikërisht prej punës vullnetare për t’u mësuar shkrim e këndim fëmijëve të ngujuar. Tre herë në javë, fëmijë të moshave të ndryshme të fshatrave Grudë të Re, Bardhaj, Mazrek, Velipojë, Dajç, Oblikë, Gur i Zi etj, presin mësuesen, e cila pasi mbyll orët e punës në shkollë, mëson të vegjlit që nuk e kanë shansin të shijojnë shoqërinë e fëmijëve të tjerë, zilen e shkollës ose qoftë edhe lojrat e zakonshme fëminore. Një punë që e bën prej vitesh, pa pagesë e shpesh pa asnjë ndihmë, një iniciativë krejtësisht personal..." - thuhet ndër të tjera në prezantim.

9 personazhet e tjerë të zgjedhur nga revista e njohur janë: Kryebashkiaku i ri i Prishtinës Shpend Ahmeti, kryeministri i ri i Shqipërisë Edi Rama, dom-i i "pazakontë" Gjergj Meta, drejtori i paketës Digitalb Alban Jaho, fituesja shqiptare e spektaklit italian X Factor, Elhaida Dani, kryeredaktori i gazetës Dita Adrian Thano, talenti shqiptar i Mançester Junajtid Adnan Januzaj, ish-kryebashkiaku i Korçës Niko Peleshi, dhe shkrimtari Ridvan Dibra, fitues në nëntor i konkursit për Dramën Origjinale Shqipe në Kosovë.

http://www.revistaklan.com/index.php?id=4229&mod=2