PS-ja bën denoncimin tronditës: Të gjithë pas Berishës në miting; dy vëllezër vdesin pa asnjë ndihmë

Për kronikën e zezë të ditës së sotme mund të përmenden, si çdo ditë, plot ngjarje. Por sot tërheq vëmendjen ajo që ka ndodhur në Rrëshen, ku dy të rinj, vëllezër me sho-shoqin, kanë përfunduar të vdekur. Për saktësi raportimi: të therur. Lajmi do jetë dhënë, me siguri, dhe nga policia, por ai ka mbërritur ndërkohë në redaksitë e lajmeve në formën e një denoncimi nga Partia Socialiste. Ç’hyn PS-ja? Hyn sepse kronika politike ndërthyret me atë të zezë.

Ja një pjesë nga raportimo-denoncimi bërë nga PS-ja: “Dy vëllezër 17 e 20 vjeç u therën në mes të qytetit, dhe për më shumë se 30 minuta policia nuk u duk. Qytetarë të shumtë, por edhe gazetarë vendorë, njoftojnë se dy të rinjtë, nga të cilët dilte gjak pa pushim, ecnin në këmbë në drejtim të spitalit, deri sa u shemben përdhe pranë murit të policisë. Qytetaret mundoheshin të njoftonin policinë, por ata nuk përgjigjeshin nga fshati Qafë-Mollë ku kryeministri po [bënte një inaugurim]… Edhe mjekët ishin në miting… Për fat u gjendën disa infermiere që kontribuan kaq shumë [por pa rezultat] për shpëtimin e jetës së dy vëllezërve.”

Re.Pu.