Propozimi i nobelistit: Të ligjërohet shitja e veshkave, sistemi aktual nuk funksionon

Një propozim i ngjashëm me thirrjen për legalizimin e, fjala vjen, marijuanës. Por këtë herë fjalë është për legalizimin e tregtisë së veshkave, dhe propozimi që ka hapur shumë debate ka ardhur nga ekonomisti Gary Becker, fitues i çmimit Nobel dhe kolegu i tij Julio Elias në gazetën “Wall Street Journal”. Thelbi I këtij propozimi është i thjeshtë: Ka njerëz që për arsye ekonomike dëshirojnë ta shesin njërën veshkë; ka dhe pacientë që presin me dëshpërim dhe luftojnë kundër kohës, teksa zgjasin jetën e tyre me kurën e vazhdueshme të dializës. Ligjërisht, veshkat për raste të tilla sigurohen kur familjarët pranojnë që veshka nga viktimat e aksidenteve etj, të dhurohet për kauzën e shëndetësisë. Por kjo mënyrë nuk zgjidh dot listat e gjata të pritjeve për transplante. Sipas propozuesve, çmimi ”i drejtë” për një veshkë të shitur ligjërisht do të ishte rreth 11 mijë euro.

Shitja e veshkave është e ndaluar me ligj dhe trafiku ilegal i organeve luftohet gati në të gjithë botën. Në editorialin e dy ekonomistëve përshkruhen shifrat rreth donacioneve në SHBA, që shohin një listë pritjeje mesatarisht prej 4 vite e gjysmë për një veshkë, metodat e përdorura për shtimin e numrit të organeve të disponueshme, etj. “Asnjë metodë e përdorur sot nuk është në gjendje të eliminojë mungesën për veshka. Nëse paguhen dhuruesit për organet e tyre, do të mund t’ia dilnin mbanë. Në veçanti, me një çmim të mjaftueshëm për veshkat, numri i organeve të disponueshme do të rritej, duke mos rritur koston e transplantimit”, thonë Becker dhe Elias. Sigurisht, propozimi ka hasur në kritikët e tij, që thonë se ky legalizim do shtonte rradhët e të varfërve që do viheshin në presion për të shitur organet.

a.k