Peter Lucas flet për proamerikanizmin që shqiptarëve u del nga rropullitë; dhe e përqesh këtë pro amerikanizëm

Peter Lucas, gazetari amerikan me origjinë shqiptare ka shkruar një shkrim për gazetën Lowell Sun, dhe Mapoja e Tiranës e ka përkthyer. Dhe shkrimi është nga ata që ia vlen ta përkthesh. Qysh në titull të vjen kjo ide: Obama duhet të vizitojë Shqipërinë.

Autori luan me mikpritjen shqiptare që u rezervohet në mënyrë të pakondicionuar amerikanëve të rëndësishëm dhe me proamerikanizmin që shqiptarëve medemek u del nga hundët. Në fakt, Lucas përdor tone përqeshëse ndaj këtyre dukurive. Pasi i sugjeron ironikisht Obamas që ta vizitojë Tiranën, ai vijon:

“Shqiptarët nuk dinë dhe as duan t’ia dinë dhe aq rreth qëndrimit vazhdimisht të ndryshueshëm për incidentin e Bengazit të administratës Obama, apo shënjestrimit nga Shërbimi i Revenusë së Brendshme të grupeve konservatore, apo ngacmimet ndaj medias. Ata e duan aq shumë Amerikën, sa edhe Richard Nixon do të kishte marrë një seri duartrokitjesh të ngrohta nëse do kishte shkuar për vizitë. Por, gabimisht Nixon-i vizitoi Rumaninë.”

Lucas i rikthehet dhe historisë së orës së humbur të Bush-it në Fush Krujë, ndonëse ajo histori është sqaruar, dmth ora ‘e vjedhur’ u gjet në xhepin e Presidentit: “Ishte këtu, në një moment historik, që Bush-i humbi orën Timex. Një moment e pati në kyç teksa zgjatej drejt turmës për të shtrënguar duar, dhe tjetrin nuk qe më. Koha dhe Timex-i ngrinë që të dyja. A i ra nga dora? Apo ia morën? A mos e futi në xhep? Mbetet një mister i pandriçuar dhe përmendorja e Bush-it, si për të përsëritur momentin, nuk ka orë në dorë.”

Shkrimin e plotë mund ta ndiqni në linkun http://mapo.al/2013/06/06/obama-duhet-te-vizitoje-shqiperine/

Re.Pu.