M. Nano i përgjigjet Zhozef Fushe-s

Zhozef Fushe shkruan në fund të Nanonews-it me titull “Më keq se sa kaq nuk ka”, se “këto që shkruhen dihen nga të gjithë në vend.......prandaj votojnë vetëm 49% e njerëzve….” Pjesa e parë e frazës, dmth që dihen të gjitha këto që shkruhen është në një masë të madhe e vërtetë. Madje, ka njerëz që dinë shumë më tepër se kaq. Ndërsa në pjesën e dytë të frazës, nëse s’e kam kuptuar gabim, Fushe ka pretendimin se shqiptarët janë të pakënaqur me politikën, e prandaj nuk shkojnë të votojnë. Mirëpo nuk është kështu, gjë që është nënvizuar herë pas here nga zëra të ndryshëm. Nuk është kështu për dy arsye. Së pari, shifrat e pjesëmarrjes që janë shpallur nga KQZ-të tona e kanë kaluar rëndom 50%-ëshin. Dhe së dyti, përqindja e pjesëmarrjes është praktikisht shumë më e madhe se sa ajo e deklaruar për shkak atë faktit që në listat e votimit janë regjistruar dhe emrat e emigrantëve. Këta të fundit nuk votojnë jo se s’duan të votojnë, por sepse s’mund të votojnë, e në këtë kuptim ulin artificialisht nivelin e pjesëmarrjes në zgjedhje. Shqiptarët që mund të votojnë, por s’duan të votojnë, rezultojnë të paktë në numër. E prandaj, çdo shifër pjesëmarrjeje e deklaruar nga KQZ-ja është në të vërtetë shumë më e vogël se sa shifra e vërtetë. Përfundimi? Shqiptarët nuk kanë demonstruar ndonjë pakënaqësi me politikën e tyre. Ose të paktën, kjo pakënaqësi, nëse egziston, nuk është demonstruar në ditën e votimit.