Lugina i kthen nderin Ramës dhe Thaçit, 200 mijë euro dhuratë dy qeverive

Shoqata humanitare "Medvegja" ka ofruar një shumë prej 200 mijë eurosh për qeveritë e Shqipërisë dhe Kosovës. Lajmi bëhet i ditur nga agjencia e lajmeve “Presheva jonë” e cila i referohet shoqatës me seli në Fully të Zvicrës. "Medvegja" po shqyrton mundësinë që të ndihmojë shtetin shqiptar dhe atë kosovar me 200 mijë euro. Sic deklarohet, shtetit shqiptar do t'i akordohen 100 mijë euro për vendosjen e mbrojtëseve në Rrugën së Kombit. 

"Kjo shumë do të jepet në mënyrë që bandat dhe gomarët të mos pushtojnë autostradën" - citohet të jetë shprehur shoqata humanitare në deklaratën e saj. Ndërkohë, agjencia preshevare e lajmeve thekson se shtetit kosovar pritet t'i jepen 86.800 euro me kusht që kjo shumë të ndahet për botime dedikuar nxënsve dhe studentëve, si dhe oligarkisë intelektuale, në mënyrë që përfundimisht të mësojnë ku ndodhen gjeografikisht Medvegja, Presheva dhe Bujanoci. 

Ndërkaq, 13.200 euro të tjera i dedikohen projektit “Kthehuni” si dhe trajtimit më dinjitoz të refugjatëve nga Lugina që kanë gjetur strehim në Kosovë dhe që, sic shprehet shoqata, duhet të trajtohen si luginarë e jo legionarë. Kryetari i shoqatës Zenel Neziri shprehet për agjencinë "Presheva jonë" se vendimi përfundimtar për ndarjen e këtyre fondeve do të merret sëshpejti nga kryesia e shoqatës në mbledhjen e saj të rregullt.

A.R