Luca Volonté i bashkohet presionit ndërkombëtar për KQZ-në

Luca Volonté, kreu i Delegacionit të Këshillit të Europës, dhe miku i hershëm Berishës, ka dhënë një intervistë për agjencinë Deutsche Welle, dhe u ka rënë borive të alarmit lidhur me KQZ-në. Ai nënvizon si pa dashje vendimin e anëtarëve të KQZ-së për të dhënë dorëheqjen, dhe jo vendimin e Berishës për të shkarkuar Muhon, në themel të kësaj që ka ndodhur, por apeli i tij, me tone të shqetësuara, u drejtohet të dyja palëve.

Ja se ç’thotë ai: “Vendimi i disa partive për të dhënë dorëheqjen nga KQZ është një rrezik real, objektiv për funksionimin e KQZ. Ndërkohë Kodi Elektoral, ligji zgjedhor ka dispozita që e lejojnë KQZ të marrë vendime edhe me 4 anëtarë, por jo vendime që kërkojnë një shumicë të cilësuar. Prandaj, Asambleja Parlamentare e Këshillit të Europës i ka bërë një apel të fortë drejtuesve politikë të shqipërisë, që ta zgjidhin krizën në KQZ, pasi ajo rrezikon kredibilitetin e rezultatit të zgjedhjeve parlamentare të 23 qershorit. Ne kemi bërë apel që të gjendet një zgjidhje për funksionimin e plotë të KQZ. Vendimin për t'i dhënë fund kësaj situate, kur nga 23 qershori kanë mbetur pak ditë, duhet ta marrin drejtuesit politikë dhe kjo duhet të bëhet në emër të së ardhmes së Shqipërisë, ky është apeli ynë, kjo është ftesa jonë.”

Re.Pu.