Enver Hoxha hoqi dorë nga postet qeveritare për Kosovën?

Teuta Hoxha, bashkëshortja e njërit prej djemve të Enver Hoxhës dhe mbesë e pasardhësit të tij në pushtet, Ramiz Alia, ka dhënë një intervistë për gazetarin Roland Qafoku në Channel One, ku ndër të tjera pyetet për marrëdhënien e Enver Hoxhës me Kosovën. Teuta Hoxha është diplomuar për histori-arkivistikë dhe ka punuar gjatë në Arkivin e Shtetit. “Shumë historianë kanë publikuar disa teza si ajo që Enver Hoxha e shiti Kosovën. Ju si i komentoni këto deklarata? – e pyet Qafoku dhe Hoxha përgjigjet:

“…Ajo që e shiti Kosovën është e papranueshme, pasi të shesësh diçka do të thotë ta kesh pronën tënde. Enver Hoxha nuk kishte ku ta gjente Kosovën, kur kufijtë ishin të përcaktuara. Ai që në fillimet e luftës Kosovën e ka pasur një nga preokupimet e tij kryesore dhe të partisë komuniste, deri në dërgimin e divizioneve për çlirimin e Kosovës. Më pas ai ka bërë përpjekje të mëtejshme por aq sa mund t’i lejohej. Enver Hoxha arriti, dhe këtë e kam të dëgjuar nga Nexhmie Hoxha, që të hiqte dorë nga posti i kryeministrit dhe ministrit të jashtëm dhe të bëhej vetëm sekretar i parë, vetëm për Kosovën. Sepse nëse ai do të kishte ato dy poste qeveritare nuk do të mund të mbronte Kosovën sepse quhej ndërhyrje në punët e brendshme të Jugosllavisë…”

Teuta Hoxha thotë më pas se Hoxha nuk ishte në dijeni përshembull për demonstratat e vitit 1981. “… Ai mundi të mbronte Kosovën me aq sa mundi. Por, p.sh për demonstratat e ’81 ai nuk ishte në dijeni dhe këtu ngrihet një pikëpyetje të madhe, sesi sigurimi dhe ministria e brendshme nuk dinte asgjë. Ai ka qenë me pushime në Vlorë, dhe informacioni erdhi nga pedagogët që shkonin aty për të dhënë mësim. Ai kthehet urgjentisht në Tiranë dhe fillojnë publikimet e shkrimeve në ZP, disa me emrin e Enver Hoxhës, disa të ideuara nga ai që mbrojtën çështjen e Kosovës. Por mbrojtja që i bënte në atë kohë Shqipëria, ishte edhe për ta bërë problemin të njohur ndërkombëtarisht….” a.n.