E pabesueshme: Berisha takon pedagogët e rinj të vendit në selinë e Partisë Demokratike!!!! Dhe u bën lavazh truri

Është e çuditshme se si gazetarëve u ka shpëtuar një lajm tronditës. Vetëm Panorama ka informuar me një gjysmë rripi në faqen 3 të numrit të sotëm. Dhe e ka bërë këtë fare pa të keq e pa vënë re ndonjë anomali në këtë mes. Cili është lajmi? Sali Berisha, në cilësinë e kryetarit të PD-së e jo në cilësinë e kryeministrit, ka organizuar një takim me pedagogët e rinj të Universitetit të Tiranës (“me pedagogët e rinj të vendit”, thotë saktësisht Panorama). Dhe këtë takim e ka bërë në selinë e Partisë Demokratike.

Sikur të mos jetë mjaft kjo, kryeministri, pasi ka tentuar “t’u bëjë një lavazh truri pedagogëve të rinj” (do ish interesante të merrej vesh se kush janë këta medemek pedagogë), i bën takimit një mbyllje në stilin e vet: “Problem mbetet pjesëmarrja e të rinjve në votime. Detyra jonë është të bëjmë gjithçka, të punojmë me çdonjërin prej tyre që të marrë pjesë në votime. T’ua dimë adresat, të dimë se ku do të jenë ata në datën 23 qershor”.

Është një ngjarje në kufijtë e surreales.

M.N.