"C"-ja e bashkëshortes së Berishës dhe një replikë e Bushatit

E përditshmja DITA hapet sot me një hulumtim mbi pikëpyetjet e hershme për lidhjet e Sali Berishës me nëntokën serbe. Gazeta e niste me një hetim në skedën familjare të bashkëshortes së Berishës, e cila emrin e nënës çuditërisht e ka të shënuar Milika, jo Milica (gazeta jepte edhe skedën e Gjendjes Civile të vëllait të saj dhe aty shihej qartë që emri i nënës ishte Milica me “c”.) Pasi rendiste një seri ngjarjesh të lidhura me interesa serbe në Shqipëri me protagonist Berishën, Dita e mbyllte editorialin e vet me fjalinë “Nëse të gjitha sëbashku janë thjesht rastësi, atëherë Berisha është… atdhetari më i pafat në rruzull”

Nuk është dakord me këtë këndvështrim Andi Bushati, i cili këtë mbrëmje në TemA Online shkruan: “Kjo pikëpyetje që ka gëluar herë në formë thashethemesh e herë në formë akuze, në të gjitha gojët e kundërshtarëve të tij, është shfaqur dje në ballinën e një gazete në ngritje, shumë e afërt me opozitën shqiptare. Në hulumtimin e saj, gazeta “Dita” vërente se në gjendjen civile, emri i nënës së bashkëshortes së kryeministrit, gjoja në formë lapsusi, është ndryshuar nga “Milica” në “Milika”. Dhe ky zbulim i gazetës i shërbente si pikënisje për një dossier të plotë lidhur me dyshimet që ekzistojnë për marrëdhënien e Berishës me serbët….”

Më pas, Bushati i ri-rendit akuzat duke dhënë një përgjigje tjetër për secilën prej tyre:  “A nuk mund të interpretohet thyerja e fshehtë e embargos si një manovër për të pasuruar njerëzit e tij, pikërisht ata që vidhnin votat dhe masakronin opozitën në vitet e para të pluralizmit? A nuk mund të shihet thirrja e dëshpëruar për të mos firmosur Rambujenë, si dufma e pashpresë për të rënë në sy, e një njeriu të lënë në harresë nga të gjithë të mëdhenjtë e globit, që atë kohë të luftës së Kosovës, parakalonin në Tiranë, pa u kujtuar se ai ekzistonte? A mund të besojë kush se Damir Fazlliçi nuk do të ish zëvendësuar sot me ndonjë pakistanez apo tip të ngjashëm, nëse këta të fundit do të kishin qenë më inteligjentë për të paguar dhe për t’u lidhur me personat e duhur? A nuk do të kishin sot Kosova dhe Shqipëria një linje të re energjetike mes tyre, nëse për projektin do të kish pasur edhe përfitime private? Të gjitha këto kundërpyetje mund të qëndrojnë të forta përballë pandehmave të mësipërme. Sepse ato, sipas meje, janë më pranë thelbit të politikanit Berisha…” (a.n.)

Shkrimi i DITA:

http://gazetadita.al/korigjojeni-emrin-e-nenes-ne-gjendjen-c...

Shkrimi i Bushatit:

http://www.gazetatema.net/web/2013/03/13/beteja-e-kote-me-be...