BE vlerëson dëmin nga korrupsioni: 120 mld euro në vit, gjysma nga Italia!

Kur flasim për korrupsionin dhe shifrat e tij, krahasimet janë gjithë relative. P.sh, nëse buxheti vjetor i një vendi si Shqipëria është tek 4.5 miliardë eurot, sipas komisioneres së Bashkimit Europian për Punët e Brendshme Cecilia Malmstrom, masa e korrupsionit në Europë i kushton ekonomisë europiane të paktën 120 miliardë euro çdo vit. Shifra është alarmante dhe për të nxjerrë të dhënat e raportit në lidhje me korrupsionin, Komisioni Europian ka ekzaminuar të 28 vendet anëtare të BE-së dhe sipas këtij Komisioni, kjo është hera e parë që bëhet një studim i tillë. Malmstrom shpjegon se Suedia është një nga vendet që ka më pak probleme në lidhje me korrupsionin, ndërsa Mbretëria e Bashkuar është cilësuar si rezultati më i mirë në këtë raport për Europën, pasi më pak se 1% e personave të intervistuar, janë shprehur se u është kërkuar të paguajnë ryshfet. Në disa vende të tjera të BE-së ka pasur një numër të lartë të raportimeve, përsa i përket eksperiencave personale në lidhje me korrupsionin. Në Kroaci, në Republikën Çeke, Lituani, Bullgari, Rumani dhe Greqi, vende në të cilat, 6 % e 29 % e të intervistuarve janë shprehur se u është kërkuar të paguajnë ryshfet, apo kanë qenë të detyruar të paguajnë një të tillë në 12 muajt e fundit.
Ndërkaq, niveli i korrupsionit në Poloni është verifikuar në 15 % , në Slovaki 14 % dhe Hungari 13 %, ku në të shumtën e rasteve, korrupsioni paraqitet në sektorin e mjekësisë. Ndërkohë që sipas këtyre të dhënave, shteti fqinj, Italia, përfaqëson 50% të korrupsionit europian, me 60 miliardë euro.

a.k