Aleatët kundër marrëveshjes “më vete” të Ramës me Ngjelën

Deklarata e Ngjelës dje për një marrëveshje me Ramën për të qenë ministër, e konfirmuar nga vetë ky i fundit në takim me gazetarët, nuk ka kaluar pa rrudhje buzësh në kampin opozitar.

Kurt Kola ka thënë për Panoramën se “nuk e di sesi e ka bërë Ngjela marrëveshjen dypalëshe me Ramën, por ne nuk kemi bërë marrëveshje për t’u bërë ministra.” Sipas tij, të gjitha partitë aleate të koalicionit opozitar kanë nënshkruar një marrëveshje ku kanë pranuar mënyrën sesi do të përfaqësohen në qeverisjen qendrore dh elokale pas zgjedhjeve.”

Më i hidhur ka qenë Petro Koçi, i cili ka deklaruar se Ngjela s’mund të jetë ministër, sepse “ai është i ekstremit të djathtë, dhe është më i djathtë se Berisha. Në këtë mënyrë ani nuk mund të jetë ministër i një qeverie të majtë, programi i së cilës nuk ka asgjë ët përbashkët me ekstremin e djathtë”. Koçi ka rikujtuar se të tëra partitë aknë një marrëveshje ku përcaktohet qartë: 500-1000 vota, përfaqësim lokal; 5mijë-10mijë vota, përfaqësim në nivel qendror qeverisjeje (zv/ministër, drejtor i lartë); 1 deputet ose mbi 20mijë vota, 1 ministër në kabinerin e ri të koalicionit.

Edhe deputeti i pavarur Arben Malaj ka reaguar duke shkruar në FB se “vendi nuk mund të drejtohet nga qeveri të shokëve dhe miqve, sepse ato janë të dështuara”. Ai ka kritikuar edhe mos-prezencën e Milos e Gjinushit në lista, duke deklaruar se “për mua, Skënder Gjinushi dhe Paskal Milo  meritojnë të jenë në Parlamentin shqiptar si pjesë e historisë dhe suksesit të së majtës, më shumë se Koço K.”

k.c.