“Fisnikëria tiranase” e Kryeministrit - Topi: për vrasësin?! Rama: për shkatërruesin e shëndetësisë?!

Dje Kryeministri Berisha mori titullin “Fisnikëria Tiranase” me rastin e 85-vjetorit të krijimit të Mjekësisë Publike. Lidhja mes fisnikërisë tiranase dhe mjekësisë publike është pak e vështirë të kuptohet, megjithatë kundërshtarët e tij politikë e kanë ironizuar fort këtë fakt. Sipas Bamir Topit, njeriu që lejoi vrasjet në Bulevard nuk karakterizohet me tipare humaniste që të gëzojë këtë titull.

“Për titullin e Berishës, turp për ata që ia kanë dhënë. Edhe në fushën e mjekësisë ka shumë figura që duhet të nderohen të respektohen sepse një mjek përpara se të jetë profesionist duhet të jetë njeri human, është bazë e profesionizmit, humanizmi. Por çfarë mund të themi për tiparet humane të këtij njeriu që vetëm 2 vite më parë nën hundën e tij në mes të kryeqytetit lejoi vrasjen e njerëzve të pafajshëm dhe sot na meritoka titullin fisnikëria tironse”, tha Topi.

Edi Rama ka qenë edhe më ironik, kur ka thënë se këtë çmim Berisha ia ka dhënë vetes, pasi ai beson që ne kemi shëndetësinë dhe spitalet më të mira në botë.

“Saliu u dekorua me medalje për vizion dhe reforma të shëndetësisë, dmth që sipas atyre që e deklaruan kryeministri që i ka bërë shëndetësisë atë që s’ja ka bërë asnjë qeveri e kryeministër tjetër, i bie që gjithë shqiptarët duhet të jenë të lumtur me këtë sistem shëndetësor. (...) Ai është i bindur se çdo gjë po shkon shumë mirë, që spitalet dhe shërbimi shëndetësor i Shqipërisë nuk ka në botë, por Shqipëria është e bindur që më 23 qershor duhet ta ndëshkojmë me një votë masive, jo vetëm si të paaftë, por si një personazh që na turpëron dhe nuk na bën nder. Do t’i japim fund talljes që vazhdon prej vitesh”, komentoi Rama.

Ja.Se.