Meta sforcohet, dhe i thotë mesazhet duke i fshehur

Në një intervistë për Pekën e televizionit UTV-së, Ilir Meta stërmundohet shumë për të rrumbullakosur shprehjet, të cilat ai nuk do donte të interpretoheshin një ditë më pas në mënyra të ndryshme. Thelbi i muhabetit ka qenë ai i zakonshmi në studio të tilla – Reformat? Ekonomia? Kriza? Jo, ç’ne! – Presidenti, dhe marrëdhëniet e Metës me Berishën, Ramën, Nanon, Topallin. Dhe për çdo ngacmim, Meta është bërë llastik. “Pavarësisht nga emrat, presidenti duhet të jetë i pranuar nga të gjithë”, i mëshon Meta një ideje, të cilën e ka thënë dhe një herë tjetër më parë. “Na duhet një proces kushtetues (këtu i vjen pas midesë Berishës), dhe një proces konstruktiv (këtu i vjen pas midesë opozitës e diplomatëve)”, e saktëson ai tezën e vet. Përballë pyetjes së mërzitshme lidhur me “kandidaten presidenciale” Topalli, kreu i LSI-së përsëriti gjithashtu mërzitshëm: na duhet një proces konstruktiv. Dhe pastaj tha një frazë disi të turbullt (saktësisht tha: kushdo që e merr përsipër kandidimin për president duhet të ketë një shkëputje të angazhimeve të mëparshme, nëse ëhstë figurë politike), që mund të përkthehet: kushdo që kandidon për President, duhet  të shkëputet nga qëndrimet partizane. Pyetjes lidhur me një aleancë të mundshme me Edi Ramën, ai i bëri bisht fare hapur: Prioriteti im është integrimi.

E.G.