Ndreca e Ndregjoni: Komunistët kanë në dorë gjithçka

Duket se po shënohet thyerja e madhe mes ish-të përndjekurve dhe partisë demokratike. Këtë e tregojnë ca ngjarje të kohëve të fundit, mes të cilave dhe do situata, ku pakënaqësia e të parëve ka patur deri dhe përthyerje të dhunshme. Partia Demokratike po demonstron shqetësim, dhe kjo don të thotë se marrëdhënia me shtresën që ka vuajtur në mënyrë të veçantë gjatë regjimit komunist ka ende vlerë në terma të imazhit për këtë parti. Një takim i Ramës me një grup ish-të përndjekurish e bëri Berishën t’u rikthehet vardisjeve për këta të fundit. Por duket se është vonë.

Në një intervistë për shqiptaren.com, Gjergj Ndreca e Besim Ndregjoni, nxjerrin në shesh një hendek që vështirë të mbushet në të ardhshmen. “Shihni kush është në pushtet, kë mban afër kryeministri, kush ka miliona, kush blen postin, kush blen votën. Ata që vuajtën burgjeve nuk kanë asgjë, pasi këta pushtetarë kanë shitur gjithçka, pasurinë kombëtare, detin, kufirin, tokat më të mira turistike, ndërsa neve vetëm na përdorin në kohë fushatash”, thotë Gjergj Ndreca në këtë intervistë. Ndërsa Besim Ndregjoni bën një arsyetim disi më konkret: “Asnjë të përndjekuri prej komunizmit nuk i është besuar ndonjë përgjegjësi publike. Me përjashtim të njërit, Simon Mirakës, i cili merret në fakt me punët e veta dhe bërtet ‘rroftë qeveria e rroftë Berisha’.”

Re.Pu.