Lad Kosta: Më gënjyen për Jaçen. Gramoz Ruçi e ka lëshuar partinë dhe ka toleruar shumë gjëra në PS

Deputeti i Partisë Socialiste për Përmetin, Vladimir Kosta në një intervistë për “Panorama” është shprehur se e kanë gënjyer për kandidaturën e Gilberto Jaçes për Bashkinë e Përmetit. “U kërkova që të mos kandidonin Gilberto Jaçen pasi ka abuzuar me fondet dhe e kam denoncuar në KLSH. Kryeministri më tha që nuk ishte Jaçe kandidati përfundimtar dhe do të vendosnin në 15 prill për këtë gjë. Por mesa duket pritën sa të binte zhurma e largimit tim dhe vendosën Jaçen. Jam shumë i zhgënjyer”, ka thënë Kosta.  Arsyeja e denoncimit të kryebashkiakut Jaçe është një investim në trotuaret e qytetit të Përmetit, ku sipas Kostës po i bëhet një shkatërrim qytetit për përfitime personale. Kosta shprehet se e kanë gënjyer një javë më parë për kandidaturën e Jaçes, duke i thënë se nuk do të jetë ai por dikush tjetër, ndërsa dje, ai është zyrtarizuar si kandidat i PS­së në këtë bashki. Deputeti i Përmetit hedh akuza edhe ndaj kryetarit të Grupit Parlamentar Gramoz Ruçi, për të cilin thotë se e ka lëshuar partinë dhe ka toleruar shumë gjëra në PS. Kosta nuk preferon që të komentojë bisedën që ka pasur me kryetarin e Parisë, Edi Rama pas vendimin që mori fillimisht për t’u larguar nga Grupi Parlamentar. Vendimin përfundimtar, Kosta do ta marrë pas një konsultimi që do të bëjë me kreun e Grupit Parlamentar, Ruçi dhe zgjedhësit e tij në Përmet.