Ermal Vila thotë se diaspora shqiptare në SHBA ka një potencial të madh intelektual dhe financiar në ndihmë të vendit të origjinës

“Zëri i Amerikës” thotë se Qendra për Zhvillim Ndërkombëtar pranë Universitetit të Harvardit zhvilloi muajin e kaluar një anketim me afro 900 shqiptaro-amerikanë me pyetjen se si mund të angazhohet komuniteti shqiptar në Shtetet e Bashkuara për të ndihmuar vendet e tyre të origjinës. Projekti që është krijuar me mbështetje edhe të qeverisë shqiptare, ka dhënë disa rezultate interesante. Kryetari i Grupit të Diasporës në Uashington, Ermal Vila thotë se anketa tregon se në Shtetet e Bashkuara ka një potencial të madh intelektual dhe financiar që mund të ndikojë pozitivisht në vendet e origjinës. Në një bisedë në studion e “Zërit të Amerikës”, zoti Vila flet për nevojën për të hapur një dialog mes autoriteteve përkatëse në vendet e Ballkanit dhe përfaqësuesve të diasporës për të gjetur rrugët më të mira të bashkëpunimit dhe shfrytëzimit të këtij potenciali në të mirë të të dyja palëve.