Gjykata lë të lirë shefin e Zyrës së Interpol Tirana. Tahiri dhe Didi janë informuar me email për kërkesën belge. Koha që ministri të japë dorëheqje?

Artan Bajraktari, shef i Zyrës së Interpol Tirana dhe Laureta Alla, specialiste, janë lënë të lirë sot nga Gjykata e Tiranës. Ata u arrestua për shpërdorim detyre, pasi u ndaluan nga Shërbimi i Kontrollit të Brendshëm në Ministrinë e Brendshme, për mosinformim për kërkesën e ardhur nga Belgjika për deputetin Mark Frroku. Gjykata vendosi detyrim paraqitje. Avokatët bënë me dije se ka qenë vetë prokuroria që ka paraqitur si prova për të akuzuar Bajraktarin emailet e tij për drejtuesit e ministrisë dhe të policisë, ku ai njoftonte ardhjen e kërkesës, ndërkohë që praktika zyrtare kërkon protokollimin e informacionit. Mirëpo tanimë çështja nuk shtrohet në aspektin procedurial, kur vjen puna për të ballafaquar përgjegjësitë. Drejtori i Policisë Artan Didi dha dorëheqjen me arsyetimin se nuk është informuar nga Interpol Tirana dhe për pasojë ai largohej duke marrë përgjegjësi morale. Emaili në fakt provon se ai ka qenë në dijeni të kërkesës dhe pas tij edhe ministri i Brendshëm, Saimir Tahiri, i cili nuk mund të dalë sot e të deklarojë se Artan Didi nuk e paska njoftuar. Po bëhet e qartë se edhe Didi edhe Tahiri kanë qenë në dijeni për kërkesën, ndonëse jo në rrugë formalisht zyrtare. Ndaj edhe loja e telefonit të prishur që po bën ministri nuk ka më kuptim. Nëse do të kishte moralin që i atribuoi dje vartësit të tij, Didi, Saimir Tahiri, i cili sot është takuar me ambasadorin amerikan në Tiranë, duhet që të japë dorëheqjen.
s.z