Shënim: Përballja PD-LSI, ose Berisha-Meta, po lë jashtë vëmendjes përgjegjësitë e kryeministrit, njëherazi kryetar i PS-së

Çështja “Doshi”, por edhe çështja “Strazimiri” me pasojat e veta gjyqësore për dy deputetët socialistë, Pjerin Ndreu dhe Arben Ndoka, janë inkuadruar, edhe pse jo në mënyrë eksplicite, të drejtë ose të padrejtë, si pjesë e procesit të dekriminalizimit. Ndoshta nuk ishte ky qëllimi, por nisja e procesit ka imponuar zgjerimin e sfondit dhe “shpërthimin” e disa të vërtetave. Gjithsesi ka një keqkuptim të qëllimshëm në të gjithë këtë debat që vjen nga instrumentalizimi politik. Dhe ky është kanalizimi i tij në një përballje PD-LSI, ose Berisha-Meta, për shkak kryesisht të nxitimit të ish-kryeministrit për të unifikuar, pas akuzave publike, procesin e dekriminalizimit me një operacion për çarjen e koalicionit qeverisës dhe diskreditimin e një prej përbërësve të tij. Gjithë në funksion edhe të zgjedhjeve që po vijnë, që kanë marrë dimension politik, por edhe të kapjes nga opozita të të drejtave të posaçme në procesin e reformës në drejtësi, që aktualisht drejtohet pikërisht nga një prej ministrave të Ilir Metës, Nasip Naços të Drejtësisë. Jo më kot, para disa ditësh, një prej anëtarëve të KLD-së, gjyqtari Gjin Gjoni, do të shprehej në Shkodër se “gjyqtarët duhet të jenë të guximshëm...pasi ka presion edhe nga Shteti”. Nëse shohim të gjithë këtë kuadër, vërejmë se atij i mungon një komponente shumë e rëndësishme: kryeministri. Pra flitet për dekriminalizimin, për heqje mandatesh, për akuza ndaj kryetarit të Kuvendit, për lëvizje të PD-së, por PS-ja me aktorin kryesor kanë mbetur jashtë. Kryeministri ka zgjedhur që të mos flasë për çështjet e ditës, ai shihet se po kultivon me këmbëngulje pasionin e fotografisë dhe është mjaftuar me tre akte publike që ta konsiderojë të përfunduar detyrimin ndaj qytetarëve; akti i parë përjashtimi i Tom Doshit, akti i dytë dëshmia në prokurori dhe leximi i një deklarate për mediat, akti i tretë intervista në “Opinion”. A mjafton vallë kaq? Duhet të biem dakord që Jo. Edhe sikur me proces dekriminalizimi të kuptojmë zbatimin e platformës së propozuar sot nga PD-ja, është e qartë se krasitja e deputetëve do të ndodhë më së shumti në Grupin Parlamentar të PS-së, i kompozuar si një zgjedhje krejtësisht personale e Edi Ramës me listat e mbyllura. Shto këtu edhe tre deputetë që janë në proces, marrim edhe paradhënien e këtij fakti, që duhet shtruar për diskutim publik. Pra çfarë përgjegjësie ka kryeministri aktual për përbërjen e Grupit Parlamentar që drejton sot? A mund të vlejë në dritën e zhvillimeve të reja, alibia e tij e Dëshmisë së Penalitetit, alibi e cila fyen që të gjithë shqiptarët? Natyrisht, Ilir Meta është ai që është, me zgjedhjet dhe përgjegjësitë e veta të mëdha politike, por më 23 qershor, “e panjohura” që kuotohej si “shpresë” e zgjedhësve ishte pikërisht Edi Rama dhe Rilindja. Ndaj edhe beteja e PD-së ndaj kreut të LSI-së, nuk ka asnjë element surprizë, për të mos thënë që diskrediton vetë besueshmërinë e opozitës. Në mënyrë që procesi të natyralizohet përmes përgjegjësive reale, duhet që në skenë të thirret edhe kryeministri aktual, për të sqaruar opinionin për arsyet e këtyre aleancave politike që ka bërë vetë, për këto “njolla të mëdha” që i ka vënë partisë së vet, siç tha deputeti Ben Blushi. E mira publike e do që kjo transparencë të bëhet në vetë të parë dhe me iniciativë, pse jo duke bërë distancimin e nevojshëm, jo me miratim në heshtje të dokumenteve të dekriminalizimit, pasi “lënia në baltë” apo “bukëshkelja” siç i kujtoi deputeti Doshi, i vlen vetëm atij si mundësi për mbyllje të këtij debati, por jo opinionit.
s. zaimi