Tërbimi i pashpjegueshëm i Imamit dhe … Kodheli që bën mirë të heshtë

Pardje në Kuvend ka patur një kacafytje mes ministres së Mbrojtjes, Mimi Kodheli, dhe paraardhësit të saj, Arben Imami. Shkaku është kallëzimi penal që ka bërë e para, nga pozicioni i kreut të dikasterit, në adresë të të dytit. Në çdo vend të botës, një veprim i tillë nuk do kish arsye të pasohej me debate e me tone të ngritura. Përkundrazi, çështja do të kalonte në duar e prokurorisë (siç ka kaluar dhe çështja në fjalë), dhe gjithçka do të ndiqte rrugën e procedurave të hetimit e të gjykimit, të cilat janë në dorë të institucioneve që s’i përkasin as maxhorancës, as opozitës.

Mirëpo jemi në Shqipëri. Personi, kundër të cilit është bërë ky kallëzim penal, ka tri ditë që bën si i tërbuar e që përpiqet të na mbushë mendjen se maxhoranca i është qepur me gurë në trastë e po i punon qindin për motive medemek personale. Po çfarë po i bëjnë? Jo ndonjë kushedi se çfarë. I kanë bërë thjesht një kallëzim penal. Me fjalë të tjera, po tentojnë të hapin një proces penal kundër tij që, për ta mbyllur, do lipset një mundim sizifian (madje S. Ngjela është i sigurtë se Prokuroria s’ka për t’i shkuar deri në fund kësaj pune). Po Imami si e ka hallin, atëherë? Situata është e qartë. Arben Imami po tregon se ka frikë, po tregon se i ka mbushur brekët. Dhe nuk është se ka frikë nga maxhoranca, e cila s’mund të bëjë asgjë më tepër se sa këtë tentativë për të hapur një proces penal. Ka frikë se gjatë procesit në ngarkim të tij do të merren vesh gjëra që hë për hë i di veç ai. Dhe një grusht njerëzish të tjerë.

Por duhet thënë se në këtë mes nuk kemi të bëjmë me një problem të Mimi Kodhelit. E prandaj nuk kuptohet ç’dreqin ka Kodheli që merret me Imamin, e me frikën e tij. Ajo nuk ka asnjë arsye të kacafytet publikisht për një çështje të tillë. Ajo ka bërë një kallëzim penal, dhe nuk ka asnjë detyrim për t’i dalë zot këtij kallëzimi faqe botës. Mund të kacafytet me Imamin për të gjitha çështjet e botës, por jo për këtë. Dhe e njëjta gjë mund të thuhet edhe për zyrtarë të tjerë të qeverisë që kanë bërë e që do të bëjnë kallëzime penale.