Video-filmimi i “Fiks Fare”, arrestohet ish-kryetari i Gjykatës së Pukës, Shtejfën Lleshi

Është arrestuar ish-kryetari i Gjykatës së Pukës, Shtjefën Lleshi, emri i të cilit u lakua gjatë një video-filmimi që emisioni “Fiks Fare” dha para disa kohësh. Në këtë video jepeshin pamje të filmuara në zyrat e gjykatës së Pukës, ku sekretarja, kancelaria dhe një qytetar numëronin paratë për të cilat deklaronin se do të shkonin në favor të prokurorit, por edhe të kreut të Gjykatës, si shkëmbim për lirimin e disa personave. Arrestimi është kryer nga Policia e Tiranës dhe gjykata dha masën e sigurisë “arrest me burg” deri në momentin kur Lleshi do dalë para trupit gjykues. Një ditë më parë Këshilli i Lartë i Drejtësisë dha autorizimin që gjykata të merrte masë për Lleshin, çka edhe u bë konkrete sot. Vetë gjykatësi ka deklaruar se do të përballet me hetimet dhe nuk do të largohet. Ngjarja ka hapur debate të mëdha, pasi në video-filmim përmendet edhe emri i kryetarit të Gjykatës së Lartë, Xhezair Zaganjori, i cili e hodhi poshtë këtë duke e cilësuar “montim të trashë”.

s.z