Diktatori komunist i Phenianit “spastron” burrin e hallës. Si grupet armiqësore të Enverit

Mediat koreanojugore njoftojnë se sipas disa burimeve të inteligjencës, diktatori riosh komunist i Koresë së Veriut Kim Jong Un, ka spostuar nga pushteti Jang Song Thaek, gjeneralin e vjetër që nuk figuron më si zv.shef i ushtrisë (i dyti në foto). Un erdhi në pushtetin e trashëguar diktatorial para dy vitesh, pas vdekjes së të atit Kim Jong Il, i cili i kishte dhënë të motrën për grua Thaek-ut. Ky i fundit ishte njeriu më i pushtetshëm në periudhën tranzitore, duke menaxhuar kalimin e pushtetit tek i riu Un, dhe mendohej se luante rol kryesor në qeverisje, duke ndikuar fort tek diktatori i ri. Duket se pasi u konsolidua në krye të piramidës komuniste, Kim Jong Un e sheh si pengesë gjeneralin, dy ndihmës të afërt të të cilit janë ekzekutuar së fundi me akuzën e korrupsionit. BBC përdor termin “shkarkuar nga detyra” për Thaek-un, por saktëson se konfirmimi i lajmeve të tilla për Phenianin është  shumë i vështirë. Pavarësisht pozicionit në familjen diktatoriale, Thaek është goditur edhe herë të tjera, për t’u ripranuar në pushtet. Për aq kuptim sa mund të ketë në sistemin komunist, ai është konsideruar si reformator dhe menaxhonte bisedimet me Kinën, aleatën e vetme të Koresë komuniste.

a.k