Ndërhyrje radikale në drejtësi, paralajmëron ministri Naço

Duke folur në Komisionin e Integrimit, ministri i Drejtësisë Nasip Naço bëri publike sot detajet e para sesi Qeveria mendon të ndërhyjë në reformën për Gjykatën e Lartë, e cila për shkak të numrit të lartë të çështjeve në gjykim, rreth 10 mijë, duket sikur është shndërruar në Gjykatë të Shkallës së Parë. “Para nesh ngelet ose të shtojmë numrin e gjyqtarëve në këtë Gjykatë, gjë që është e papranueshme për një vend të vogël, ose duhet të kufizojmë kompetencat e Gjykatës së Lartë, që jo në çdo rast, çdo çështje të shkojë në Gjykatën e Lartë", tha Naço. Reformë pritet edhe në Këshillin e Lartë të Drejtësisë, ku 2/3 e anëtarëve zgjidhen nga konferenca gjyqësore, gjë që mesa duket, “ka ndikim jopozitiv në vendimarrjen e KLD-së”, pasi gjyqtarët bëjnë ndere dhe votojnë duke larë borxhet e njëri-tjetrit. Aktualisht Qeveria ka paraqitur një paketë antikorrupsion, me të cilën kërkon të parandalojë korrupsionin edhe në gjyqesor dhe sipas ministrit të Drejtësisë “nëse ka vullnet, korrupsioni mund të dalë në dritë edhe mes gjyqtarëve dhe prokurorëve”.

a.k