Berluskoni “nxirret” në rrugë. Kavalieri: “Do të rikthehem mes njerëzve”. Pyetje nga Shqipëria: “Po morali u respektua”?

Silvio Berluskoni nuk është më pjesë e senatit italian. Përfaqësuesit italianë i kanë dhënë fund karrierës së tij me një vendim që konsiderohet historik. Por vetë Kavalieri ka dalë në shesh për t’u kujtuar të gjithëve se ai nuk do të dorëzohet. Dhe këtë e ka bërë me një propozim të ri. Sipas tij duhet të luftohet nga populli për të arritur që Presidenti të zgjidhet në mënyrë të drejtpërdrejtë. Nuk është e qartë nëse kjo lëvizje është një akuzë për Napolitanon, apo Berluskoni synon të rihyjë në lojë nga “poshtë”. “Do të rikthehemi mes njerëzve”, tha ai pas seancës. (http://www.corriere.it/politica/13_novembre_27/decadenza-rimosso-striscione-colpo-stato-insorge-forza-italia-violata-liberta-parola-e9b23116-575d-11e3-901e-793b8e54c623.shtml). Si një politikan me profil ndërkombëtar , është e natyrshme që Berluskoni, apo dalja e tij nga skena të komentohet edhe në Shqipëri. Vlen për t’u sjellë një koment i ish-ministrit tonë të Jashtëm, Tritan Shehu, që e përshkruan kështu përzënien nga politika italiane të ish-kryeministrit. “Berluskoni nuk është më senator. Heshtje e thellë në Senat mbas votimit. Një ngjarje e trishtuar kjo për politikën italiane. Për mbi 20 vite, Berluskoni nuk u mund dot me votën e qytetarëve. "U mund" me një vendim gjyqësor, në shumë aspekte jo i qartë ky. Ligji u respektua, vendimi gjyqësor u respektua! Po morali u respektua? Po vota e 30% të elektoratit u respektua?!

Sidoqoftë shpresoj e uroj që Italia të ketë stabilitet politik e qeverisës. Kjo i nevojitet Italisë, por dhe Shqipërisë. Më tej, më 2015, do t'i takojë përsëri elektoratit italian të rivendosë. Sidoqoftë Berluskoni dhe “Forza Italia”, pa asnjë dyshim do vazhdojnë të jenë pjesë e politikës italiane”.

s.z