Mal Berisha, bëhet gati dosja e shkarkimit. Çfarë e bën me faj Ambasadorin?

Duket se Ministria e Jashtme ka ndër mend t’ia “lërë në derë” ambasadorit shqiptar në Londër, z. Mal Berisha përgjegjësinë për thyerjen protokollare me pasojë mungesën e diplomatit në takimet zyrtare të Kryeministrit Rama në Londër. Sipas Shqiptarja.com që citon burime brenda MPJ,  veprimi i katër ditëve më parë i ambasadorit tonë në Londër Mal Berisha, që nuk bëri asnjë përgatitje për vizitën e kryeministrit Rama në Britani dhe takimin e tij me homologun Cameron madje duke e lënë dhe pa eskortë, do të pasohet me kërkesën për shkarkimin e tij.

Madje, burimet pretendojnë se “Ambasadori ynë në Londër Mal Berisha as që ka denjuar të takojë kryeministrin Edi Rama”.

Siç dihet, tashmë, Rama nuk ka qenë as i shoqëruar nga ndonjë eskortë e forcave të sigurisë së vendit mikpritës.

Ajo që mbështet versionin zyrtar të rastit (versioni tjetër, është që Rama e shpërfilli qëllimisht Ambasadorin tonë në Mbretërinë e Bashkuar) është fakti që sipas protokollit shoqërimi i kryeministrit nga forcat e sigurisë ose policia e vendit përkatës është një procedurë rutinë, që duhet të kërkohet nga Ambasada e Shqipërisë në vendin që viziton kryeministri. Mungesa e kësaj eskorte, bën që dyshimet të bien mbi neglizhencën ndaj protokollit e z. Berisha, i përfolur si mik i ngushtë i ish-Kryeministrit.

k.c.