Arvizu: Ligji në Shqipëri nuk është i barabartë për të gjithë

Në një intervistë të dhënë për gazetën “Shqip” ambasadori Arvizu u tregua mjaftueshmërisht i hapur dhe direkt. Për drejtësinë Shqiptare u shpreh pa doreza se:

"Mendoj se po vijmë tek ai që për mua është një nga problemet më të ngutshme, që për mua është kultura e pandëshkueshmërisë, ku ligji nuk zbatohet në mënyrë të barabartë për të gjithë njerëzit. Nuk mendoj se kam një përgjigje për këtë”, thotë Arvizu.

Ndërsa për çështjet e nxehta si ajo 21 janarit dhe ajo e ish zv kryeministrit Meta ai tha:
“Përsa i përket ekspertizës, që ju përmendët, nuk ka pasur asnjë përfshirje zyrtare në këtë çështje. Gjithçka që mund të them është që kompanitë që ne kemi rekomanduar janë kompani që i kemi besuar mjaftueshëm, saqë kemi përdorur paratë e tatim-paguesve amerikanë, që ato të ofrojnë trajnime. Për sa i përket 21 janarit, asistenca është e drejtpërdrejtë, përfshin FBI-në, laboratorin special që ka ndihmuar prokurorët me hetimin e këtij rasti, duke filluar që nga logjistika e hetimit si dhe drejtimi i hetimit. Prokurorët shqiptarë po drejtojnë hetimin por mendojmë që ka qenë domethënës fakti që SHBA-të duhet të përfshihen direkt”.

Më shumë se kaq, ngelet vetëm që Arvizu dhe ambasadorët e tjerë ta veshin vetë togën e gjyqtarit. Ndoshta një ditë dhe kjo mund të ndodhë.

A.K.