Islami i befasuar: Do investigoj rezultatin zgjedhor. Dhe më tej: Rama më hodhi në humnerë

Parashikimet e tij me shkrime në trajtë analize ku përziheshin shifra, krahasime e ekuacione, kryesisht tek gazeta “Panorama”, ende janë të freskëta: “Pse PS nuk fiton dot vetëm”, pastaj “Pse PS-ja edhe me LSI-në nuk fiton dot”, dhe më tej “Pse PD-ja do fitojë gjithsesi”. Kastriot Islami, tashmë deputet i PD-së, ka folur për A1 Report lidhur me rezultatin befasues zgjedhor, duke lidhur gjithçka me një fenomen të mistershëm që ka ndodhur javën e fundit para zgjedhjeve. “Javën e fundit ka ndodhur diçka që më befasoi. Nuk mund ta them akoma çfarë ndodhi se jam duke investiguar… Rezultati surprizë është dyfishimi i votave për LSI”, tha Islami. Ama, për herë të parë Islami përdor edhe përcaktor të fortë lidhur me pasojat që i dha atij politikisht konflikti me Edi Ramën. “Karrierën unë e mbyll vetëm nëse nuk më do populli, jo nëse nuk më do Edi Rama, që më hodhi në humnerë”, thotë Islami, duke shtuar se Berisha “i vlerësoi kontributet e mia prej shtetari”. Ish kryetari i Kuvendit dhe shumë herë ministër socialist, Islami tani do të jetë pjesë e grupit parlamentar të PD-së. Nëse nuk ndodh ndonjë surprizë, nga ato që s’kanë nevojë për investigim.

Re.Pu