Kohë të vështira për Vetëvendosjen, që po krijon keqkuptime, moskuptime e kundërshtarë

Puna ka ardhur që lëvizja ‘Vetvendosje’ të jetë pothuaj e vetme kundër të gjithëve. Ajo ka bërë opozitën gjithë këto kohë, ajo po e bën dhe sot opozitën, madje në një mënyrë që nuk mund të mos tërheqë vëmendjen e atyre që ndjekin zhvillimet në Kosovë, por kohët e fundit janë krijuar dhe moskuptime e keqkuptime me një numër aktorësh e faktorësh lokalë e ndërkombëtarë. Marrëdhënieve të vështira me SHBA-të i është shtuar “plaga” që ka marrë në krahun e saj prej protestuesve ambasadorja amerikane. Po këto ditë, ata janë ballafaquar mes deklaratash të ashpra me partinë e Haradinajt, AAK-në, që është gjithashtu në opozitë. Në këtë seri ngjarjesh ka rënë në sy dhe ngjarja tjetër, që ka lidhje me deputeten e tyre, Alma Lamën, e cila ka dhënë shenja se është e pakënaqur nga drejtuesit e Vetëvendosjes, pasi e lanë pa mbrojtje politike përballë sulmeve që i erdhën, sipas saj, nga elementë që përfaqësojnë islamin radikal në Kosovë.

Dje, me anë të një shkrimi në gazetën Express, opinionisti Arben Idrizi mbronte tezën se “Vetëvendosja është duke i dhënë një kthesë të çuditshme nacionalizmit shqiptar në Kosovë (për aq sa ajo e përfaqëson dhe ngërthen në vete atë)”. Ku e ka fjalën? Drejtuesit e Vetvendosjes janë “duke e çuar këtë nacionalizëm në shtratin çiftëzues të ekstremizmit islamik”, thotë Idrizi, që nuk mjaftohet me kaq. Është dhe më i ashpër: “Për Vetëvendosjen dhuna është mjet; Vetëvendosja s’do të heqë kurrë dorë nga dhuna; aq më tepër kur (nëse do) të vijë në pushtet. Sepse atëherë do t’i duhet edhe më tepër.” Shkrimin e Idrizit mund ta gjeni të plotë në linkun http://gazetaexpress.com/?cid=1,883,115501

Re.Pu.