Emigrantët e “Rilindjes” e zgjidhën vetë problemin e votës, 68 mijë erdhën më 23 qershor

Debateve të të dy krahëve të politikës për votën e emigrantëve, këtë radhë i kanë dhënë zgjidhje vetë emigrantët. Me përfundimin e procesit zgjedhor dhe rezultatit që Partia Socialiste mori më 23 qershor rezulton se vota e emigrantëve shqiptarë ka qenë vendimtare në fitoren e së majtës përballë Partisë Demokratike.

Të dhënat e siguruara qoftë nga pikat kufitare përmes sistemit TIMS, por dhe burime nga Partia Socialiste, flasin për mbi 68 mijë emigrantë nga Greqia. E përkthyer në mandate, vota e tyre ka prodhuar 6 ose 7 deputetë.

Qarqet në të cilat vota e emigrantëve shqiptarë nga Greqia pati ndikim flitet se janë Vlora, Gjirokastra, Fieri, Berati dhe Tirana, qarqe në të cilët partia Socialiste shënoi një rezultat të thellë qoftë si subjekt por edhe si koalicion.

PS kishte organizuar një fushatë mobilizimi dhe ndërgjegjësimi të emigrantëve, e cila rezultoi e suksesshme, ajo ka premtuar që do të mundësojë brenda mandatit të parë qeverisës votën e emigrantëve në shtetet ku ata jetojnë prej dhjetëra vitesh.

Zh.