A do të përfundojë vërtet numërimi sonte? Kukanit ja premtuan, por pak si zor

Për rezultate paraprake numërimi, afërmendsh që edhe raporti i parë përkatës i OSBE-ODIHR-it për zgjedhjet e 23 qershorit do të ishte paraprak. Gjithnjë në frymën e “disa hapave pozitive, por kemi vënë re edhe difekte”, ku theksi kryesor i vihet përfundimit të procesit të zgjatur të numërimit, ky raport nuk u përcoll me shumë vëmendje në media. E kuptueshme kjo, përderisa fokusi është drejtuar tek mbarëvajtja e fazës delikate të numërimit. Por ama, është për t’u nënvizuar deklarata e shefit të delegacionit të PE-së për Europën Juglindore, Kukan, i cili në një intervistë për Dojçe Velen pohoi sot se ka marrë fjalën e dy liderëve konkurrentë, Rama e Berisha, se procesi i numërimit do të përfundojë sonte në orën 10 të mbrëmjes. “Nuk ishte proces perfekt zgjedhor”, tha ai, “por të presim mbylljen e numërimit”. Si thelë mbi bisht, Kukan përmend se të njëjtin premtim ka marrë edhe nga kryetarja e KQZ-së, Lefterie LLeshi. Por jemi një orë përpara këtij afati, dhe rezulton të jenë numëruar diçka më pak se gjysma e 5508 kutive në rang vendi.  

A.K.