“Fiks Fare” siguron “lista të zeza” me ata punonjës administrate që abstenojnë apo votojnë kundër PD-së

Aktivistët e zyrave elektorale të PD-së janë treguar shumë “të kujdesshëm dhe profesionalë” në detyrën e ngarkuar, fakt që e vuri në dukje  emisioni “Fiks Fare” të Top Chanel në transmetimin e mbrëmëshëm. Dokumentet zyrtare të siguruara nga gazetarët e “Fiksit” tregojnë aktivitetin e ethshëm partiak për të siguruar votat, në grupseksionet 1857 në  njësinë numër 6 te shkolla “Myslym  Keta” me 2390 zgjedhës dhe 1858 po  aty, me 1491 zgjedhës dhe që të dyja  janë në zonën e Kombinatit. Lista e atyre që janë kontaktuar  dhe kanë pranuar që të paraqiten pranë  zyrës elektorale të PD-s shkon në 41  punonjës. Janë infermierë, punëtorë krahu, ushtarakë, policë, mësues filloreje,  shoferë, policë trafiku, sanitare, policë  bashkiakë, ciceronë në Muzeun Kombëtar, drejtor shkolle, punonjës te Zyra  e Kthimit dhe Kompensimi i Pronave.

 Në një listë tjetër janë skeduar 70 abstenuesit, që  janë kontaktuar dhe që nuk janë paraqitur pranë zyrës së PD-së. Një fletë e veçantë është me 8 punonjës administrate, që sipas PD-së duhen rikontaktuar që të “ftillohen” dhe ata janë një kujdestar te Instituti i Fëmijëve  që nuk dëgjojnë, një punëtor parqesh,  tre ushtarakë, një polic etj. Ekziston edhe një listë tjetër, ai i refuzuesve, ku janë 3 emra./Zh.