Katundarët janë shndërruar në një kategori e përbuzshme sociologjike në Shqipëri

Në Shqipëri, katundarët (në një zhargon përqeshës: katunarë, pa “d”) janë shndërruar në një kategori sociologjike. Kohët e fundit kanë zënë t’i përmendin shpesh për të bërë shpjegime e interpretime të problemeve e sëmundjeve të shoqërisë shqiptare. Në këta binarë ka ecur dhe Dritan Shano në një shkrim të vetin të publikuar në Mapo, me titullin “Me kundratabelë”. Në një paragraf të tërë, ai bën përkufizimin e kësaj “paradigme”, duke e vënë përballë kategorisë tjetër (“shumë të fisme”, sipas tij), asaj të fshatarëve:

“… Katundari vazhdon të jetë i pazoti të ketë një ideal të zgjedhur lirisht, ndryshe nga fshatari që qytetarizohet shpejt. E pikërisht, prandaj jeta e tij nuk është gjë tjetër veçse një shtirje. I fortë me ata që ka poshtë dhe servil me ata që ka mbi krye. Katundar sepse i pëlqen vetja dhe hiqet ai që nuk është. Katundar se gjithmonë justifikohet për zullumin që kryen, asnjëherë nuk e pranon atë. Katundar se gënjen pa shkak, ditën për diell. Katundar se do më shumë qelepirin se punën. Por mbi të gjitha, katundar sepse bën hile dhe gjithmonë ha në kandar. Ha në kandarin e së tashmes dhe më keq akoma, në atë të së ardhmes. I ha në kandar vëllait të vet dhe fëmijës që do lërë pas. I ha në kandar ligjit, e përthyen, e kapërcen, e shtrëngon, e liron, e shkel pa vuajtur aspak. Sipas Gallupit, katundari shqiptar do fort të bëhet qytetar europian. Por me mënyrën e vet të zbatimit të ligjit. Duke ecur kundravajtje. Me kundratabelë. Që të legjitimojë kundravajtjen. Kundratabela në çdo akt dhe gjest të katundarisë shqiptare është treguesi kryesor i krizës morale që mban mbërthyer vendin e Shqiponjave në këtë tranzicion vlerash të tejzgjatur, me ç’duket për arsye endemike.”

Shkrimin e plotë të Shanos mund ta ndiqni në linkun http://mapo.al/2013/06/10/me-kundratabele/

Re.Pu.