Batelli: fushata e mbushur me pretendime për parregullsi elektorale, pengesë për Shqipërinë në rrugën drejt BE(?!)

Top Channel njofton për refuzimin për të dhënë intervistë nga ana e Roberto Batelli-t, koordinatorit special të OSBE-së, i cili do të udhëheqë misionin afatshkurtër të misionit të vëzhgimit të zgjedhjeve nga OSBE, në ditën e parë të vizitës në Tiranë.

Deputeti slloven me origjinë italiane, Roberto Batelli, njëkohësisht shef i Thesarit i Asamblesë Parlamentare të OSBE-së, është i dyshuar nga media në Tiranë se është i afërt me Grossruck.  Dyshimet përligjen pasi Batelli u pat deklaruar pro raportit dhe vlerësimeve të Grossruck për zgjedhjet e 2009-ës në Shqipëri, që i konsideroi të rregullta.

Megjithatë, Batelli ka preferuar të dërgojë një deklaratë në të cilën thotë: “Këto zgjedhje do të jenë një tjetër test se sa të gatshëm janë aktorët politikë në Shqipëri për të kontribuuar në mënyrë aktive dhe konstruktive për institucionet e vendit, pavarësisht konkurrencës politike dhe kundërshtimeve rreth interpretimit dhe zbatimit të ligjeve. Objektivi parësor i OSBE-së është dhënia e mundësisë qytetarëve për të matur performancën e garuesve politikë. Njëkohësisht të sigurojë që zgjedhja që do të bëjnë qytetarët të jetë jo e paragjykuar gjatë procesit elektoral.”

Dhe në fund shton edhe se “Një fushatë elektorale e mbushur me pretendime për parregullsi elektorale do të shërbente si një çrregullim i mëtejshëm tek votuesit, njëkohësisht pengesë për Shqipërinë në rrugën drejt BE-së”. Me këto logjikë, mos vallë duhet të bërtitet vetëm me zë të ulët, “kapeni hajdutin”?

k.c.