Debat mbi Koliqin: Përfshihen Ndreca, Zhiti, Vehbiu, Nikolla

Një shkrim i Ardian Ndrecës në përkujtim e nderim të Ernest Koliqit (ndiq linkun http://www.mapo.al/2013/05/18/ne-pervjetor-te-ernest-koliqit/) dhe një shkrim i Visar Zhitit mbi të njëjtin argument (ndiq linkun http://www.panorama.com.al/2013/05/20/ernest-koliqi-letrar-u-denua-nga-koleget-e-tij/) e kanë ngacmuar Ardian Vehbiun, dhe e kanë bërë ta thotë të vetën lidhur me Ernest Koliqin si personalitet i kulturës dhe si personalitet i politikës (në foton tonë: Ernest Koliqi me Eqerem Çabejn). Thotë Vehbiu: “Vepra letrare e Koliqit tashmë është botuar dhe përfshirë në bibliotekën e letërsisë kombëtare; krahas asaj të Fishtës, të Mjedës dhe të autorëve të tjerë të koinesë shkodrane. Në këtë kuptim, rehabilitimi i Koliqit, si veprim në thelb i nevojshëm, është duke u kryer.” Dhe më poshtë: “Çfarë ende nuk është bërë me këtë autor dhe personalitet të kulturës shqiptare, është njohja, botimi, popullarizimi dhe studimi i veprimtarisë së tij kulturore pas Luftës, kur jetonte në Itali; dhe veçanërisht aktivizimi i tij në revistën ‘Shêjzat’”.

Dhe pastaj vjen radha e por-it: “Por a mund të rehabilitohet edhe si figurë historike, një kolaboracionist i fashizmit?... Thonë, të dy autorët, se Koliqi vërtet bashkëpunoi me fashistët, por nuk i leu duart me gjak; përkundrazi, e shfrytëzoi postin dhe autoritetin për të ndihmuar çështjen kombëtare – p.sh. duke ndihmuar arsimin shqip në Kosovë. Edhe kjo nuk diskutohet; madje shërben si dëshmi se edhe gjatë Luftës II gjërat nuk kanë qenë të prera me thikë, bardhezi, sikurse kanë dashur më pas fitimtarët t’i përshkruajnë. E megjithatë, dënimin e këtyre figurave bashkëpunuese nuk është se e eksperimentoi për herë të parë Shqipëria e Enver Hoxhës; ashtu u veprua aso kohe në mbarë botën – shembulli i Ezra Pound-it të vjen në mendje….”

Shkrimin e plotë të Ardian Vehbiut mund ta ndiqni në linkun http://xhaxhai.wordpress.com/2013/05/21/rreth-koliqit/

Dhe poshtë shkrimit të plotë, tek komentet e lexuesve, do gjeni një ndërhyrje polemike të sociologut Albert P. Nikolla. Ja se ç’thotë ai: “Mund te kemi edhe nje interpretim paksa pozitiv te veprimtarise politike të Koliqit nen nje kendveshtrim qe Koliqi vete e pohon “si veprimtari kunder kuqalasheve qe do te shkaterronin Shqiperine”. Dhe ne fakt kuqalashet e shkaterruan vertete Shqiperine….Une vete jam kritik me veprimtarine politike te Koliqit, Harapit, Krujes e mjaft te tjetreve, por nuk jam ekstremist ne gjykim. Per mua kolaboracionisti me i rrezikshem dhe me i demshem ishte ai i jugosllaveve, alias, enver hoxha.”

Re.Pu.