Rama do jetë në Vlorë sot në orën 18.00; por fillimisht u dërgon vlonjatëve “ca emocione të vetat”

Kreu i socialistëve, Edi Rama ka sot në orën 18.00 takimin elektoral me vlonjatët, dhe i ka dhënë dum punës ta presë (apo të përgatisë të tjerët për) këtë takim në një mënyrë, që di ta bëjë mirë. Ka shkruar diçka në blogun e vet, së cilës i ka dhënë një ngjyrim shumë emotiv. E fillon duke thënë se “si asnjëherë në rrugën e jetës sime politike, ndjehem i emocionuar si të isha përpara provimit më të vështirë të matures; kam shumë gjëra për të thënë për Vlorën dhe më duket sikur nuk do di t’i them”. Pastaj e lëshon veten në një valë malli për kohë të shkuara, dhe me këtë nxjerr në evidencë një lidhje të tijën me këtë qytet.

Ja pasazhi ‘nostalgjik’: “Këto ditë më kujtohen shpesh rrugëtimet e fëmijërisë drejt Vlorës, në ditët më të bukura të vitit gjatë pushimeve verore që nisnin me tren deri në Fier pastaj me autobus për në Vlorë. Më kujtohet se si më rrihte zemra fort nga padurimi i gëzuar për të mbërritur, kur shfaqeshin në ekranin e dritares së autobuzit të vjetër malet e bardha të kripores. Të cilët ishin edhe shenja që lajmëronte fundin e udhëtimit të gjatë. Pastaj se si më shkonte buza vesh më vesh dhe shtrëngoja dorën e dajës që zakonisht vinte më merrte në Tiranë, kur shfaqej poshtë, tek kthesa e fundit majë kodrave me ullinj, vetë kurrizi joshës i Vlorës së shtrirë buzë detit. Dhe në fund se si merrja vrapin, kur hynim në rrugicën gjithë diell, gjelbërim e lule të varura mureve të kopshteve me hardhi e kumbulla vlonjate, për të mbërritur tek dera e oborrit të shtëpisë më të bukur në botë. Dera me hekur të punuar kishte një muzikë të vetën kur hapej, duke ndjellë vrik qenin besnik të shtëpisë dhe lajmëruar gjyshen time që dilte gjithnjë në krye të oborrit për të pritur vizitorët. Përqafimi me të ishte fundi i rrugëtimit dhe fillimi i një qejfi të papërshkrueshëm që e prisja gjithë vitin.”

Por nuk i del nga mendja ngjarja, nga e cila ka marrë ngacmimin për të shkruar këto radhë. “Ju pres në Pallatin e Sportit, në ora 18.00”, thotë në mbyllje të shënimit.

Re.Pu.