Nënshtrimi, një tipar që tok me mercenarizmin, e bartim prej qindra vjetësh?

Dje u publikua një email mobilizues që u ish dërguar drejtorëve të shkollave të Fierit, me anë të të cilit u kërkohej këtyre të fundit të ngrinin në këmbë mësuesit e tyre, të dilnin për të pritur Berishën. Sot portalet online të gazetave Tema e Dita kanë botuar disa SMS ku një përfaqësues i stafit të kandidatit për Tiranën, Gazmir Dibra, me emrin Almir Gurakuqi kërkon t’i dorëzohen kartat e identitetit “Tuajat dhe të familjarëve” – shkruan.  

Është e qartë që ka presione të ndryshme mbi zgjedhësit për të votuar Berishën në 23 qershor edhe nëse nuk e dëshirojnë një gjë të tillë. Por pse viktimat e këtyre këtyre presioneve binden? Një përgjigje e jep sot Mustafa Nano në një opinion botuar në të përditshmen SHQIP ku ndër të tjera shkruan:

“Frika se mos humbasin vendin e punës bën të vetën (këtë më thanë ata), por është dhe një skrupull a stepje e një lloji tjetër. Ka që e shpjegojnë dhe me një frikë abstrakte, me një frikë se mund të ndodhë shumë më tepër se sa humbja e vendit të punës por, sipas meje, ka një teprim në këtë mes. Ky shpjegim i fundit është një alibi që ata ia kanë gjetur vetes. Po, motivi kryesor, për të cilin ata nuk e ngrenë zërin, është frika se mos humbasin vendin e punës. Dhe nëse mund të flitet për një motiv tjetër, ky motiv do të ishte një dispozicion i tyre psiko-mental për të ulur shpinën, për t’u nënshtruar, për t’u konformuar me mainstream-in, e mbi të gjitha me autoritetin, e në mënyrë më specifike me pushtetin. Ky është një tipar që, tok me mercenarizmin, shqiptarët e bartin prej qindra vjetësh….” a.n.

Nano: http://gazeta-shqip.com/lajme/2013/05/16/eshte-mobilizuar-sh...

SMS-të: http://www.gazetatema.net/web/2013/05/16/pd-u-mbledh-kartat-...