Berat: E nxjerrin nga salla, ngaqë guxoi t’i bënte një pyetje Berishës

Quhet Polikseni Zoto, është nga Berati, është ish e përndjekur nga regjimi komunist, dhe  - kjo është e dhëna më e fundit ‘biografike’ e saj – ka marrë pjesë në një takim që Berisha ka patur me gratë e qytetit të një mbi një dritareve. Dhe Shqipi informon: “Kryeministri foli për të ardhmen, vendin që duhet të ketë gruaja në shoqëri dhe prioritetet që shpalos programi i PD-së për këtë forcë. Ndërsa priteshin pyetje nga salla, një nga të ftuarat, pikërisht Polikseni Zoto, i është drejtuar Kryeministrit, duke e pyetur nëse programi që paraqet PD-ja është vërtetë në favor të gruas, pasi deri më sot, kur vetë PD-ja ka udhëhequr qeverinë, ka pasur vetëm emërime nepotike në administratë. Ajo është shprehur se për të zënë një vend pune duhet miku dhe korrupsioni dhe nuk merren parasysh aftësitë profesionale.”

Çfarë përgjigje ka dhënë Berisha? Asnjë përgjigje. Shqipi thotë se “menjëherë janë ngritur në këmbë krerët e Partisë Demokratike, të cilët ia kanë rrëmbyer mikrofonin nga dora ish të përndjekurës, duke e nxjerrë me forcë jashtë sale”. Berisha ka ndjekur skenën me maskën e buzëqeshjes në fytyrë. Pa thënë asnjë fjalë.

Re.Pu.