Rama zotohet se “21 janari do të jetë amaneti i viteve në opozitë”. Dhe bën një mea culpa para të vetëve

Rama ka tentuar sot të bëjë një rikompaktësim të partisë, duke thënë në një mbledhje të Grupit Parlamentar se pas 23 qershorit do të ketë vend e nevojë për të gjithë. “Nga ky grup do të dalë skuadra fituese e 23 qershorit; askush nuk do mbetet jashtë rrugës tonë pas 23 qershorit; gjithësecili do marrë përgjegjësitë e mëdha për të garantuar suksesin e mandatit tonë qeverisës”, tha ai, dhe mendja ta thotë se me këtë ai ka synuar të ngrohë sadopak ata që kanë mbetur, apo do të mbeten, kokëmënjanë e qejfprishur. Në këtë pikë, ai ka bërë dhe një mea culpa përpara të vetëve. “Nëse ka ndodhur, dhe [me siguri] ka ndodhur, që të kem gabuar me ndonjërin prej jush, [ky është rasti që t’] ju kërkoj sinqerisht ndjesë. Për mua gjithë pjesëtarët e këtij grupi janë dhe do të mbeten rrugëtarët drejt fitores më 23 Qershor”.

Por theksin e ka vënë tek 21 janari, dhe me sa duket ka dashur të qetësojë shpirtrat e trazuar të atyre që kanë zënë të mendojnë se, për shkak të koalicionit PS-LSI, ajo ngjarje do të harrohej e hidhej pas shpine. “Kemi humbur njerëz si të ishim në fushë lufte me armikun, jo vend pluralist. 21 janari mbetet amaneti i madh i këtij 4 vjeçari në opozitë, dhe një nga synimet për drejtësi”. 

Por … ka një ‘por’ interesant: “ata [Berisha e Co.] nuk janë të gatshëm të lënë pushtetin, sepse nuk përballojnë dot hijet që kanë pas vetes. I ndjekin hijet e 21 janarit, i ndjekin hijet e Gërdecit, hijet e atyre të vrarëve në një vend ku krimi ka marrë kontrollin, ku policia është tërhequr e tradhtuar nga një kupolë në Ministrinë e Brendshme që shkëmben favore me krimin”. 

Re.Pu.