Konventë e FRD-së: Topi sulmon PD-në, por nuk harron as PS-në (sidomos për Gërdecin)

Më pak se dy muaj para zgjedhjeve dhe një vit pas themelimit, FRD-ja ka mbajtur një Konventë elektorale. Fillimisht, Topi ka shpjeguar vendimin për të dalë më vete në zgjedhje, gjë që në FRD është mirëkuptuar e mbështetur: “Të futesh në koalicione pa asnjë moral dhe princip, pa asnjë kohezion programor, nuk ka kuptim; nuk mund të kthehemi në njerëz që …fyejnë [njëri-tjetrin] dhe dalin të nesërmen sikur nuk ka ndodhur asgjë; është moral që nuk na përket ne, por i përket politikës së vjetër, që nuk ofron asgjë për shqiptarët”.

Kreu i FRD-së hodhi një numër ‘spicash’ për PD-në gjatë fjalës së tij: “Të gjithë e dinë që e djathta është në krizë, pasi investoi shumë për ish-komunistët, zyrtarë që për hir të interesave të pushtetit kanë braktisur çdo nocion të së djathtës; kjo e djathtë në pushtet zgjodhi aleancë me ish-komunistët dhe gjysmën e opozitës së majtë, ndërkohë që dëboi ish-dhjetoristët dhe ish-të përndjekurit; kjo e djathtë në pushtet nuk e njeh nocionin bazë të demokracisë, votën dhe oponencën; nuk nxit dhe as mbështet një partneritet aktiv dhe të sinqertë me SHBA-të dhe BE-në”.

Por ka patur për të thënë edhe për PS-në. “Pas shpërthimit të Gërdecit me 15 mars të vitit 2008, në momentin kur opozita shqiptare duhet të kishte qenë më shumë aktive se kurrë në pozicionin e saj për të nxjerrë të palarat e pushtetit, për atë që ndodhi në Gërdec, dhunimin dhe masakrimin e pushteteve, kjo e majtë në vend që të bënte opozitën, u fut në proces duke i dhënë oksigjen pushtetit, që vijoi dhe me 21 prill të vitit 2008, kur u u bënë bashkautorë të dhunimit të Kushtetutës dhe bashkëautorë të rënies së institucioneve njëri pas tjetri”, tha ai.

Re.Pu.