Gjykata e Tiranës dënon edhe vëllanë e dytë të viktimës së 21 janarit

Gjykata e Tiranës ka gjobitur me 1 mln lekë të vjetra vëllain e Hekuran Dedës, Hilmi Deda. Vendimi është dhënë sot pas padisë për “shpifje” që kishte ngritur ndaj tij,  efektivi i Gardës, Fatos Skeja. Për të njëjtën akuzë, Zabit Deda, vëllai tjetër i Hekuran Dedës  është gjobitur pak kohë më parë për shpifje nga Gjykata e Tiranës.

E perditshmja Panorama shkruan ne faqen e saj online: "Gjykata e denon Hilmi Deden me 1 milion leke gjobe dhe e detyron gjithashtu të përgënjeshtrojë deklaratat e tij dhënë në media. “Strumbullari” i padisë për shpifje të Skejës kanë qenë deklaratat publike të familjes Deda dhe pretendimet se Fatos Skeja u ka ofruar para dhe foton e vrasësit në këmbim të një vizite të Kryeministrit në banesën e tyre. Deklarata e Hilmi Dedës ka patur këtë përmbajtje; “më 23 janar 2011, në orën 11:30 të natës, na erdhi në shtëpi, piu edhe kafe. La edhe një 10 mijë lekësh. Pasi doli në rrugë kërkoi të bisedonte me mua dhe me vëllain e madh. Ishte dhe vëllai i vogël aty. Na premtoi një shumë lekësh: ‘Prisni Berishën. Pranoni Kryeministrin, pasi keni një shumë parash, që i kam mbajtur në valixhe dhe do ju tregoj fotografinë që ka qëlluar mbi Hekuranin”. Re.Pu.