Sikur të isha në vend të Ilir Metës!

Për këtë shkrim, më ngacmoi pyetja që Mustafa Nano i bëri Ilir Metës dhe përgjigja që Ilir Meta i dha asaj pyetjeje.

Ilir Meta ka bërë një llogari të kujdesshme të bilancit të pritshëm të votave në zgjedhjet e ardhshme dhe me siguri i ka dalë që PD-ja humbet, madje edhe po të dilte në zgjedhje së bashku me partinë e tij.  Ilir Meta ka nuhatje të mprehtë për të përcaktuar se nga ç’anë do të fitojë dhe se me ç’anë duhet të shkojë. Për këtë arsye, edhe pse me PD-në arriti të siguronte aq shumë përfitime, sa ndofta as nuk i kishte shkuar kurrë mendja, e braktisi atë, ashtu siç braktisin minjtë anijen që po mbytet edhe pse në të kanë ushqim të bollshëm, dhe përqafoi dorën e shtrirë të Edi Ramës, i cili jo vetëm që nuk duhej ta ftonte në koalicionin e tij, por edhe sikur t’i lutej Ilir Meta, nuk duhej ta pranonte.

Edhe Edi Rama llogarit se sa do t’i shtohen votat e tij po të bashkohet me të Ilir Metën, dhe i del se do t’i shtohen, të paktën, aq vota sa merrte LSI-ja, por ai nuk llogarit se sa vota do t’i pakësohen nga të tijtë, dhe nga të tijtë më të mirë, nga ata që kanë ende njëfarë karakteri dhe që nuk e pranojnë dot bashkëpunimin me një person si Ilir Meta dhe me një parti si LSI-a.

Meta është virtuoz në shfrytëzimin e frikës së dy kryetarëve të dy partive kryesore nga humbja e pushtetit dhe e përdor atë frikë në mënyrë mjeshtërore për interesat e tij, duke pasur parasysh edhe se në psikikën e një shumice shqiptarësh të sotëm, pavarësisht se ç’përfaqësojnë në të vërtetë veprimet dhe politikat e Ilir Metës, ato perceptohen si veprime dhe politika që meritojnë lavdërime e jo kritika, si zgjuarsi dhe jo si imoralitet. Por, realisht, Ilir Meta, pasi ndoti më keq nga ç’ishte Sali Berishën, tashti po ndot edhe Edi Ramën.

Tashti të vijmë te pyetja e Mustafa Nanos në gazetën DITA dhe përgjigja e Ilir Metës:

Pyetje: “Sikur karriera juaj politike të ndërpritej tani, përse mendoni se do të mbaheshit mend në histori?”

Përgjigje: (qesh)... “Do më duhej një kohë e gjatë për të bërë vlerësime të tilla. Jam ende në fillimet e karrierës sime”.

Të isha unë në vend të Ilir Metës, do të përgjigjesha: “Flisni e shkruani sa të doni ju, analistë e komentues, opinionistë e specialistë, ju që dilni përnatë në televizion e që shkruani përditë në gazeta, një palë që lëvdon Sali Berishën e një palë tjetër që lëvdon Edi Ramën. Po të siguroj o Mustafa se unë do të mbahem mend në histori si i pari që u nxori bojën me vepra e jo me fjalë, njëkohësisht të dyve: Sali Berishës dhe Edi Ramës dhe, në të ardhmen, nuk dihet se dhe kujt tjetër. Populli shqiptar duhet të njohë udhëheqësit e tij, duhet të kuptojë se si shiten e blihen ata për një copë pushtet. Dhe ky nuk është një kontribut i vogël imi”.

Dhe, më në fund, pyes unë, cili duhet konsideruar si më i keq, si më fajtor: Ilir Meta pa asnjë parim, apo Sali Berisha e Edi Rama që shkelin çdo parim për pak pushtet dhe i jargaviten Ilir Metës? Ilir Meta, një simbol i korrupsionit, një njeri që, ndofta, nuk përmbahet dot dhe e ngjyen dorën kudo, apo Sali Berisha dhe Edi Rama që bëjnë shok e bashkëluftëtar një njeri të tillë?