Sa duhet të ndryshojë raporti i votave nëpër qarqe, që të ketë rotacion

Numri i mandateve të çdo qarku nuk ndryshoi nga 2009-ta, pavarësisht se ndryshoi popullsia në to. Dhe duket se Gjykata Kushtetuese nuk do ta çbëjë këtë shkelje të Kushtetutës. Në këto kushte, që të ketë rotacion, duhet të ndryshojë raporti i votave brenda qarqeve. Le t’i analizojmë me rradhë qarqet, për të parë se sa është minimiumi i domosdoshëm i ndryshimit të votave, që të kemi ndryshim mandatesh parlamentarë në ta.

Parantezë: Analiza bazohet në presupozimet e mëposhtme

1. KQZ-ja dhe administrata zgjedhore do të jenë po aq favorizuese ndaj PD-së sa ç’ishin në 2009-ën;

2. LSI dhe PBDNJ do të formojnë një koalicion të qendrës, siç kanë lënë të kuptohet deri më sot;

3. AK do të jetë në koalicion me PS-në, siç ka deklaruar Sekretari i Përgjithshëm i saj (me kusht që, siç ka thënë ai, “zuska” LSI të mos jetë pjesë e këtij koalicioni);

4. FRD s’do të jetë në koalicion me asnjërën nga partitë e vjetra;

5. Në qoftë se shpërndarja e votave do të mbetet identike si në 2009-ën, koalicioni opozitar do të marrë vetëm 64 mandate.

Qarku Berat

Që koalicioni opozitar të marrë një mandat më shumë në Berat, i duhet të marrë vetëm 105 vota më shumë se në 2009-ën, ndërkohë që koalicioni qeveritar (i cili tani përfshin edhe LZHK e PDK) duhet të humbasë 105 vota. Në qoftë se FRD arrin të marrë rreth 10 mijë vota të djathta (që duket shumë e vështirë të ndodhë) dhe LSI+PBDNJ ruajnë votat e 2009-ës, koalicioni qeveritar humbet edhe një mandat tjetër.

Qarku Fier

Që koalicioni opozitar të marrë një mandat më shumë në Fier, i duhet të marrë minmumi 1000 vota më shumë se në 2009-ën (rreth 0.5% të të gjithë votave të qarkut), ndërkohë që koalicioni qeveritar (i cili tani përfshin edhe LZHK e PDK) duhet të humbasë 1000 vota. Në qoftë se FRD arrin të marrë rreth 11 mijë vota të djathta (që duket shumë e vështirë të ndodhë) dhe LSI+PBDNJ ruajnë votat e 2009-ës, koalicioni qeveritar humbet edhe një mandat tjetër.

Qarku Tiranë

Që koalicioni opozitar të marrë një mandat më shumë në Tiranë, i duhet të marrë minimumi 5500 vota më shumë se në 2009-ën (rreth 1.4% të të gjithë votave të qarkut), ndërkohë që koalicioni qeveritar (i cili tani përfshin edhe LZHK e PDK) duhet të humbasë 5500 vota. Në qoftë se FRD arrin të marrë rreth 12 mijë vota të djathta (që duket e mundshme të ndodhë) dhe LSI+PBDNJ ruajnë votat e 2009-ës, koalicioni qeveritar humbet edhe një mandat tjetër.

Qarku Vlorë

Që koalicioni opozitar të marrë një mandat më shumë në Vlorë, i duhet të marrë minimumi 2400 vota më shumë se në 2009-ën (rreth 2.3% të të gjithë votave të qarkut), ndërkohë që koalicioni qeveritar (i cili tani përfshin edhe LZHK e PDK) duhet të humbasë 2400 vota. Në qoftë se FRD arrin të marrë rreth 10 mijë vota të djathta (që duket shumë e vështirë të ndodhë) dhe LSI+PBDNJ ruajnë votat e 2009-ës, koalicioni qeveritar humbet edhe një mandat tjetër.

Qarku Durrës

Që koalicioni opozitar të marrë një mandat më shumë në Durrës, i duhet të marrë minimumi 3500 vota më shumë se në 2009-ën (rreth 2.6% të të gjithë votave të qarkut), ndërkohë që koalicioni qeveritar (i cili tani përfshin edhe LZHK e PDK) duhet të humbasë 3500 vota. Në qoftë se FRD arrin të marrë rreth 11 mijë vota të djathta (që nuk duket e pamundshme të ndodhë) dhe LSI+PBDNJ ruajnë votat e 2009-ës, koalicioni qeveritar humbet edhe një mandat tjetër.

Qarku Elbasan

Që koalicioni opozitar të marrë një mandat më shumë në Elbasan, i duhet të marrë minimumi 4400 vota më shumë se në 2009-ën (rreth 2.8% të të gjithë votave të qarkut), ndërkohë që koalicioni qeveritar (i cili tani përfshin edhe LZHK e PDK) duhet të humbasë 4400 vota. Në qoftë se FRD arrin të marrë rreth 11 mijë vota të djathta (që nuk duket e pamundshme të ndodhë) dhe LSI+PBDNJ ruajnë votat e 2009-ës, koalicioni qeveritar humbet edhe një mandat tjetër.

Qarku Korçë

Që koalicioni opozitar të marrë një mandat më shumë në Korçë, i duhet të marrë minimumi 5100 vota më shumë se në 2009-ën (rreth 3.8% të të gjithë votave të qarkut), ndërkohë që koalicioni qeveritar (i cili tani përfshin edhe LZHK e PDK) të humkbasë 5100 vota. Në qoftë se FRD arrin të marrë rreth 10 mijë vota të djathta (që duket shumë e vështirë të ndodhë) dhe LSI+PBDNJ ruajnë votat e 2009-ës, koalicioni qeveritar humbet edhe një mandat tjetër.

Në qarqet e tjera

Që koalicioni opozitar të marrë nga një mandat më shumë në qarqet e tjera duhet që 8%-10% e votave të çdo qarku të ndrojnë krah nga mazhoranca tek opozita, ndërkohë që LSI+PBDNJ të ruajnë votat e 2009-ës. Ndërsa FRD-së do t’i duhen rreth 11 mijë vota në çdo qark që të marrë mandat si parti më vete (që duket shumë e vështirë të ndodhë).

Konkluzion

Në qarqet Berat, Fier e Tiranë, lëvizja e mandateve nga mazhoranca te opozita ka një probabilitet të lartë, sepse duhet vetëm një ndryshim i krahut të votimit 0.1%-1.4% të totalit votave të çdo qarku që të ndodhë lëvizja. Në qarqet Vlorë, Durrës, Elbasan e Korçë lëvizja e mandateve ka një probabilitet mesatar, sepse duhet një ndryshim minimum i krahut të votimit nga 2.3% në 3.8% të totalit votave të çdo qarku që të ndodhë lëvizja. Ndërsa në qarqet e tjera, lëvizja e mandateve ka një probabilitet të ulët, sepse duhet një ndryshim minimum i krahut të votimit prej 8% deri 10% të totalit votave të çdo qarku që të ndodhë lëvizja. Madje në Shkodër dhe Lezhë, më afër marrjes së një mandati shtesë është koalicioni mazhoritar, e jo ai opozitar.

Shënim: Kjo analizë tregon se sa është minimiumi i domosdoshëm i ndryshimit të votave në qarqe, që të kemi ndryshim mandatesh parlamentarë në ta. Nëse ky ndryshim do të materializohet apo jo, do ta marrim vesh vetëm pas 23 qershorit…