Në cilat vende ia vlen të jesh nënë dhe fëmijë? Po Shqipëria si është?

Organizata Save the Children ka publikuar raportin e vet Mothers' Index Rankings për vitin 2011, ku jepet, siç tregon dhe titulli në anglisht i raportit, një klasifikim i vendeve mbi bazën e kushteve të krijuara në favor të nënave, grave e të fëmijëve. Shkurt, ky raport tregon se në cilin vend ia vlen të jesh nënë, grua e fëmijë. Tabela e klasifikimit ndahet në tri pjesë: 1. lista e vendeve më të zhvilluara, në të cilin kanë futur dhe gjithë Ballkanin, përfshirë Shqipërinë (nuk kuptohet pse Kosova nuk figuron si shtet më vete në këtë studim); 2. Lista e vendeve më pak të zhvilluara; dhe 3. Lista e vendeve shumë pak të zhvilluara.

Si zakonisht në klasifikime të tilla, në vend të parë gjendet ndonjë vend nordik, ose të gjitha vendet nordike. Konkretisht, organizata jo qeveritare Save the Children, duke e bazuar vlerësimin e vet në indikatorë të tillë si vdekshmëria maternale, përdorimi i kontraceptivëve, jetëgjatësia, vitet e shkollimit, shpërblimi në punë krahasuar me burrat, përqindja e pjesëmarrjes së grave në qeverisje, etj, ka nxjerrë në vend të parë Norvegjinë, dhe pastaj me radhë Australinë, Islandën, Suedinë, Danimarkën. Franca është në vend të dhjetë, Anglia e 13-a, Italia e 20-a, SHBA-të të 31-jtat, etj.

Vendet më problematike në këtë drejtim janë ato të pritshmet, dmth Afganistani, Nigeria, Jemeni, etj.

Shqipëria është e fundit në kategorinë e vet në të tre klasifikimet, që tregojnë gjendjen e grave, të nënave e të fëmijëve. Para nesh janë Maqedonia, Bosnja e Moldavia.

Re.Pu.