Lideri, Ekipi dhe Programi rëndësi e dorës së parë`

Lidhur me analizën e Erjon Veliajt "Mësime strategjike për ne socialistët, nga konventa e demokratëve"

********

Erioni më ka pëlqyer në trajtimin e temave të tij, edhe kur kam pasur opinion “të ndryshëm”…Shkurt, më pëlqen që ai nuk ngurron të ofrojë debat në marrëdhënie me atë që beson. Shqetësimi i tij është i vërtetë, i vjetër dhe i ri për marrëdhëniet politike të PS-së brenda dhe jashtë saj. Ai quhet thjesht, EKIPI! Ka qenë sëmundja e vjetër e së majtës shqiptare e cila vërehet gjerësisht edhe si “sëmundje” e majtistëve europianë. E majta socialdemokrate ka humbur qendërzimin e saj social si “kompromis historik” midis tradicionit djathtist dhe komunizmit radikal. Kjo “tharje” idesh ka kultivuar thithjen e “ideologjisë” nga LIDERI. Kjo padyshim që nuk kalon pa efekte anësore. Lideri dhe ekipi që mbulon spektrin e paraqitjes së tij tek votuesit po marrin një rëndësi të dorës së parë. Erioni vjen tek situata në Partinë Socialiste nëpërmjet eksperiencës amerikane të Konventës së  Demokratëve.

Në parim jam dakord me të pesta “piketat” e Erionit ( http://respublica.al/opinion/2012/09/08/5-mesime-strategjike-per-ne-socialistet-nga-konventa-e-demokrateve). Vetëm se unë do të nënvizoj pikën 4 (Programi, si vizatim i ëndrrës për të ardhmen). Mendoj se nuk duhet t’i shmangemi “cinizmit” të realitetit postkomunist. Shqipëria po privatizohet. Kjo po ndryshon dramatikisht mënyrën e të parit të zgjedhjeve dhe zgjidhjeve në shoqëri. Vendi ynë po ndjek në parim këshillat e ekonomistit nobelist, Milton Fridman, për privatizimin. Shërbimet, energjia, arsimi dhe pronat publike po privatizohen gjerësisht. Ajo që po ndodh në terma praktikë është se qeveria është duke “dalë nga loja” e vendimmarrjes qeveritare, shqiptarët janë mësuar të shohin. Privatizimi në vend ka ngritur normalisht pyetjen në se munden që trajtimin e “barabartë” të qytetarëve ta bëjnë privatët dhe mekanizmat e tregut?! Përgjigja është e thjeshtë. Tregu nuk i ka zgjidhur asnjëherë problemet sociale. Përkundrazi, njihet si krijuesi i tyre. Unë Erionin e kuptoj pikërisht kështu.

Sot, privatizimi në Shqipëri jep përgjigje vetëm për atë që ka ndodhur në procesin e humbjes së kontrollit publik mbi ekonominë. Sfida duket se do të jetë në ripërcaktimin e përgjegjësisë publike. Rrezikojmë të qeverisemi nga bizneset dhe biznesmenët e padukshëm. Pas kësaj “barazia” nuk do të ketë alternativë përveç polarizimit shoqëror, ndarjes së varfërisë dhe të “paprekshmëve”.

Mbetem shpresëplotë, pasi ashtu si Erioni, besoj se shumica e qytetarëve të vendit tim nuk kanë “çmim”! “Ti nuk je për t’u shitur” ishte logoja e një fushate kundër prostitucionit vite më parë. Mbase, ja vlen ta përdorim sërish dhe për të gjithë publikun! Në këtë pikë Erioni është veteran i papërsëritshëm…