Shqipërisë të gjithë i dalin përpara në radhë

Kërkesa e Shqipërisë për të marrë statusin e vendit kandidat është bërë nja dy vjet e gjysmë më parë. Ka qenë prilli i vitit 2009, data 28, kur kryeministri shqiptar, me pompë të madhe e me maskën e një gëzimi të papërshkruar në fytyrën e tij, mori avionin dhe vrapoi në Pragë, ku e priste kryeministri çek Mirek Topolanek, i cili, ashtu si shumë të tjerë, nuk ishin dakord me ngutin e vizitorit shqiptar për ta bërë këtë kërkesë disa javë përpara zgjedhjeve (zgjedhjet ishin planifikuar të mbaheshin në qershor). Por Berisha bëri të vetën. Ai u kthye nga Praga me lajmin se kish dorëzuar kërkesën. Në çdo vend tjetër, ky lajm do ish krejt i pabujshëm, pasi bëhej fjalë për dorëzimin e një kërkese. Mirëpo Berisha, me ndihmën e mediave të veta, e shndërroi në një lajm nacional.

Ç’është bërë me atë kërkesë? Asgjë. Vende të tjera që nuk kanë bërë zhurmë të madhe mbi dorëzimin e kërkesës kanë lëvizur drejt BE-së, ndërsa Shqipëria është në vendnumëro. Maqedonia e ka marrë statusin e vendit kandidat qysh në vitin 2005, ndërsa Mali I Zi prêt të caktohet data për fillimin e procedurave për anëtarësim. Serbia e bëri këtë vit kërkesën për statusin e vendit kandidat, e ka rrezik ta marrë brenda vitit, ndonëse ka vijuar gjithë këto kohë ta mërzisë Europën me vicklat anti-Kosovë. Vetëm Shqipëria dhe Bosnja janë macet e zeza në Ballkan (Kosova është histori më vete). Bosnja e ka prej konflikteve ndëretnike e ndërfetare. Ndërsa Shqipëria …..

E.G.