Opozita vijon të vuajë nga tensionet e brendshme

Edi Rama duket se po heq shumë për ta mbajtur kompakte e të bashkuar, jo vetëm Partinë Socialiste, por edhe koalicionin opozitar. Zërat kundër brenda partisë vijojnë të jenë zëra kundër, por edhe takimet e bëra mes krerëve të partive të opozitës kanë treguar se mes tyre ka diçka që s’shkon. Njëherë shfaqet Ngjela me objeksione të vetat ndaj leadership-it të Ramës, pa e përmendur emrin e këtij të fundit, herë shfaqen  me radhë Gjinushi, Milo, Dule, etj. Nuk mungojnë të shfaqin objeksione edhe të tjerë aktorë të politikës, të cilët janë më pak protagonistë se sa kanë qenë njëherë e një kohë, si Meidani, Pëllumbi, Agolli. Këtyre u shtohen dhe zëra nga fusha e mass-media-s. Për herë të parë pas shumë kohësh, televizioni Top-channel i kushtonte vëmendje dje një takimi në Vlorë të organizuar nga Malaj e Harasani, ku të dy deputetët e PS-së nuk kanë kursyer kritikat në adresë të Ramës. Top-channel-i nuk është shquar deri më sot në transmetimin e kronikave  të tilla “kaq pak të rëndësishme”; ndoshta “për t’i shërbyer kauzës, e për të mos dhënë idenë se opozita është fije-fije”.

Edi Rama do ta ketë të vështirë të futet në zgjedhjet e vitit 2013 në një atmosferë të tensionit të brendshëm. Përvoja e garave të shkuara ka treguar se çdo strategji fitoreje duhet të fillojë me shtrëngimin e  radhëve dhe me rekuperimin e asaj që ka humbur rrugës.

Re.Pu.